Siońnia ŭ minskim ofisie Quote Roller pracujuć 16 čałaviek, jašče 14 pracujuć u San-Francyska i Paŭdniovaj Karalinie. Prahrama dazvalaje adsyłać i adsočvać kamiercyjnyja prapanovy, maje 4 tysiačy płatnych klijentaŭ i blizu 10 tysiač biaspłatnych. Jana skiravanaja najpierš na anhłamoŭny śviet. Stvaralnik Quote Roller Mikita Mikada źjechaŭ u Kremnijevuju dalinu try hady tamu.
Mikita Mikada, fota: Jaŭhien Jarčak / dev.by
Pośpiech Quote Roller Mikada źviazvaje ź nizkaj canoj (prahrama za 50 dalaraŭ zamianiaje try pradukty na 300 dalaraŭ sumarna). Ale pryznaje:
pradavać pačali pozna, biźnies-prahramy treba pradavać jašče za hod da vypusku.
Da taho ž, peŭny čas pryvablali tolki drobnych klijentaŭ — śpiecyjalist pa prodažach źjaviŭsia tolki paŭtara hoda tamu i adrazu pavialičyŭ siaredniuju sumu ŭhodaŭ z 500 dalaraŭ da 5-20 tysiač. A voś dyrektara, naniataha ŭ ZŠA, vyrašyli zvolnić.
Taksama pamyłkaj jon nazyvaje bojaź pradavać častku kampanii (dumali: «Addać 8% — niešta mnoha, nu jaho»), bo heta dazvoliła by chutčej vyjści na ciapierašniuju vyručku. Kali atrymali hrošy, to bajalisia ich tracić, chacia było by varta — na markietynh, prodažy, PR.
«Ahresiŭniej treba być u internet-biznesie, bo kali budzieš tarmazić, znojdziecca chtości ahresiŭniej za ciabie, chto źbiare bolš, patracić bolš, zrobić lepšuju kamandu pa prodažach i markietynhu»,
— na dumku Mikady, heta praŭdziva nie zaŭsiody dla spažyvieckaha rynku, ale zaŭsiody dla rynku biźnies-pasłuh.
Jaho kampanija nie maje imhniennaha prybytku — pakupniki płaciać za padpisku na pasłuhi. Hrošy, što traciacca na pryvablivańnie karystalnikaŭ, nie viartajucca imhnienna. Ale heta nie pryčyna zvalniać śpiecyjalistaŭ pa prodažach — Quote Roller jašče nie achapiŭ i dziasiataj doli patencyjnaha rynku.
Bližejšaja meta jaho kampanii — dasiahnuć peŭnych ličbaŭ pa vyručcy, naraścić departamient markietynhu i prodažaŭ, raspracavać partuhalskuju i ispanskuju viersii Quote Roller. Paralelna raspačynać inšy prajekt Mikada nie płanuje.
Siedziačy ŭ Biełarusi, Quote Roller zarablali by mieniej, śćviardžaje Mikada.
Jechać u Kremnijevuju dalinu ŭsim nie abaviazkova — ale tam možna zavieści znajomych siarod kiraŭnikoŭ departamientaŭ prodažaŭ kampanij kštałtu Google, ludzi tam lohka dzielacca prafiesijnymi sakretami, jakija u Biełarusi ŭ śfiery biźnies-pasłuh mała chto viedaje.
Žyćcio navučyła jaho asabista pravodzić intervju z kandydatami na pracu. «Navučycca pracavać ź ludźmi, kiravać i natchniać - samaja składanaja zadača. Zrabić pryhožy pradukt - heta adno. Kudy składaniej stvaryć kampaniju, u jakoj pracuje niekalki sotniaŭ čałaviek», — kaža jon.
Pavodle jaho słoŭ, pra Biełaruś u Kremnijevaj dalinie nie asabliva viedajuć.
Biełaruskaja IT-śfiera nie vypracavała svoj brend — chutčej viedajuć uschodnie-jeŭrapiejskich prahramistaŭ. Bolš-mienš viadomaja Estonija — dziakujučy Skype i reputacyi «startap-chaba».
Ź Biełaruskich prahramnych praduktaŭ vykarystoŭvaje mesendžer Viber i karty Maps.ME, jaho kamanda karystajecca bahtrekieram TrackDuck. A voś u «Tanki» nie hulaje — jak i ŭ hulni naohuł.
Knihi, jakija rekamiendavaŭ Mikita Mikada:
- Piter Cil, «Zero to One»
- Set Fryman, «The Art of Negotiating the Best Deal»
- Džejms Rykards, «Currency Wars»
- Aaran Ros, «Predictable Revenue»
- Dejł Karnehi, «Jak zavodzić siabroŭ i ŭpłyvać na ludziej»