Rasiejski MZS 14 lutaha vystupiŭ z zajavaj «z nahody vykanańnia minskich pahadnieńniaŭ ab urehulavańni ŭkrainskaha kanfliktu».
Źniešniepalityčnaje viedamstva paćviardžaje vysokuju acenku pryniataha dakumienta i ad imia Rasii vykazvaje hatoŭnaść sadziejničać realizacyi dasiahnutych damoŭlenaściej.
«Razam z tym surjoznuju tryvohu vyklikaje toje, što aficyjnyja pradstaŭniki ŭkrainskaha boku ŭ asobie ministra zamiežnych spraŭ Ukrainy P.A.Klimkina, a taksama niekatorych zachodnich dziaržaŭ, u pryvatnaści ZŠA, pa sutnaści, salidaryzavalisia ź mierkavańniem radykalnych nacyjanalistaŭ u Viarchoŭnaj Radzie i stali skažać źmiest minskich damoŭlenaściej, staviačy pad sumnieŭ realizacyju kankretnych punktaŭ adobranaha lidarami Rasii, Hiermanii, Francyi i Ukrainy dakumienta. Na fonie zajaŭ pradstaŭnikoŭ Daniecka i Łuhanska, jakija kažuć ab svaim adkaznym dačynieńni da vykanańnia pryniatych na siabie abaviazacielstvaŭ, ceły šerah vykazvańniaŭ, zroblenych ukrainskimi palitykami ŭ Kijevie, naściarožvaje», — havorycca ŭ zajavie.
«Hałoŭny pasył minskich pahadnieńniaŭ zaklučajecca ŭ tym, što nieabchodna spynić bajavyja dziejańni, ažyćciavić advod ciažkich uzbrajeńniaŭ, prystupić da realnaj kanstytucyjnaj reformy na Ukrainie», — padkreślivajuć u viedamstvie.
MZS Rasii raźličvaje, što ŭsie padpisanty minskaha dakumienta ad 12 lutaha, a taksama baki, jakija padtrymali minski praces, uklučajučy Hiermaniju i Francyju, zrobiać usio, kab dasiahnutyja damoŭlenaści niaŭchilna vykonvalisia.
Jakija kankretna vykazvańni Klimkina i pradstaŭnikoŭ Zachadu tryvožać rasijski MZS, u zajavie nie zhadvajecca. Miž tym aficyjny Kijeŭ aścierahajecca, što pieramirje, jakoje pavinna pačacca ŭ 0 hadzin 15 lutaha, budzie sarvana bajevikami.
