Alaksandr Łukašenka chacieŭ by abmierkavać situacyju va Ukrainie z Uładzimiram Pucinym i Piatrom Parašenkam u trochbakovym farmacie. Pra heta jon zajaviŭ u intervju viadučamu infarmacyjna-analityčnaj prahramy «Centralnaje telebačańnie» rasijskaha telekanała NTV Vadzimu Takmianiovu.
«Ja zaŭsiody chacieŭ i ciapier jašče bolš chaču skazać: chłopcy, davajcie siadziem i na spravie, voś my ŭtroch biez usiakich pasrednikaŭ, damovimsia, jak my spynim hetuju vajnu, kali my chočam jaje spynić, jak zrazumieć i jak zaścierahčy voś hetych ludziej, jakija šmat chto idejna vajavali za svaju ziamlu, jak ź imi damovicca?» — skazaŭ jon.
U intervju Łukašenka taksama padzialiŭsia niekatorymi padrabiaznaściami praviadzieńnia sustrečy «narmandskaj čaćviorki» i raskazaŭ, čamu jon telefanavaŭ Pucinu napiaredadni mierapryjemstva. «Ja jamu raskazaŭ, jak damaŭlalisia, što voś heta zrabili, heta zrabili, navat dzirki na asfalcie zalapili, — skazaŭ kiraŭnik dziaržavy. — Ja kažu: paŭtysiačy žurnalistaŭ, cikavaść kałasalnaja. Ale, napeŭna, kažu, ty nie adsačyŭ, u internecie ŭžo pačynajuć ukidvać, što Pucin plunie na ŭsio… Voś ja jamu heta raskazaŭ i kažu: ja ciabie čakaju ŭ Minsku».
Padčas raźvitańnia ź Piatrom Parašenkam Łukašenka zapytaŭ va ŭkrainskaha lidara pra jaho ŭražańni ab sustrečy. «Jon skazaŭ: my zrabili maksimum, vielmi ciažka budzie pracavać ź imi. Ja potym žartam kažu: dy narmalnyja jany chłopcy i ŭ Daniecku, i ŭ Łuhansku, damovimsia. Jon zaśmiajaŭsia i kaža: nu, tvoj by aptymizm usim», — raskazaŭ Łukašenka.
Intervju było zapisana 13 lutaha i siońnia viečaram budzie pakazana ŭ efiry prahramy «Centralnaje telebačańnie».
