Bajavy bieśpiłotnik Predator u Aŭhanistanie. (Massoud Hossaini/AP)
Čałaviek abvodzić na ekranie myškaj robataŭ u ramku i pasyłaje ich u boj — tak u budučyni moža vyhladać apieracyja pa vykarystańni bajavych bieśpiłotnikaŭ, śviedčać płany Ahienctva pierśpiektyŭnych abaronnych daślednickich prajektaŭ (DARPA) Pientahona.
U sakaviku DARPA praviadzie šerah sustrečaŭ na temu «Sumiesnyja apieracyi ŭ niebiaśpiečnych zonach». Hałoŭnaja tema — zrabić prahramnaje zabieśpiačeńnie, jakoje dazvalaje adnamu čałavieku kantralavać dziejańni adrazu niekalkich bajavych bieśpiłotnikaŭ. Zaraz adzin piłot kantraluje tolki adzin dron praz spadarožnikavuju suviaź, pry hetym jamu dapamahaje aperatar sistem nazirańnia i kamanda analitykaŭ vyviedki.
Novaja schiema pavinna dazvolić piłotu dziejničać u značnaj stupieni samastojna, vybudoŭvać taktyku boja ŭ realnym časie i biez umiašalnictva lišnich ludziej — jak heta robić čałaviek, jaki hulaje za kamputaram u hulniu kštałtu Warhammer:Dawn of War.
U dadatak niezaležnaść ad spadarožnikaŭ suviazi i adsutnaść patreby ŭ šmatlikich kansultacyjach rezka palepšać samu łahistyku apieracyj bieśpiłotnikaŭ.
«Taksama, jak vaŭki palujuć zhrajami… hrupy bieśpiłotnikaŭ zmohuć supracoŭničać pamiž saboj, kab znachodzić, adsočvać, paznavać i źniščać celi pad kiravańniem tolki adnaho čałavieka», — skazaŭ mieniedžar prahramy Žan-Šarl Lede.
Da taho ž abjadnańnie bieśpiłotnikaŭ u intehravanyja hrupy daść mahčymaść rabić vuzkaśpiecyjalizavanyja bieśpiłotniki dla kožnaj funkcyi, a nie sprabavać zrabić kožnuju mašynu ŭniviersalnaj.
Raspracoŭki ŭ hetym kirunku nie tolki rezka źnizić patrebu ŭ vykarystańni tradycyjnych samalotaŭ u rajonach, dzie samalot moža być padbity, a lotčyk moža być uziaty ŭ pałon, jany taksama mohuć pryvieści da stvareńnia sistemy masiravanaha nieatamnaha bombavaha ŭdaru pa praciŭniku, jaki maje dastatkova dobruju supraćpavietranuju abaronu.
Dla hetaha bieśpiłotniki roznaha pryznačeńnia mohuć być pabudavanyja ŭ cełuju sistemu, jakoj jany buduć abaraniać adzin adnaho ad varožaj supraćpavietranaj abarony, vieści vyviedku i radyjoelektronnuju baraćbu, źniščać celi na ziamli.
