Pa infarmacyi sajta «Anarchičny Čorny Kryž — Biełaruś», 29 studzienia ŭ Minsku prajšli try akcyi salidarnaści z aryštavanymi anarchistami. Takim čynam aktyvisty vyrašyli pakazać, što za akcyju salidarnaści 16 studzienia na sutki adpravili nie tych ludziej.
Adna z akcyj prajšła kala doma, dzie žyvie sudździa, jaki sudziŭ anarchistaŭ. Na padjezdach i mašynach u dvary aktyvisty pakinuli ŭlotki pra hetuju spravu i rolu ŭ joj sudździ.
Jany taksama raskleili pa horadzie ŭlotki «Majo pieršaje słova na rodnaj movie — aryšt», «Majo pieršaje słova na rodnaj movie — kajdanki»,«Majo pieršaje słova na rodnaj movie — dopyt», «Majo pieršaje słova na rodnaj movie — aŭtazak». Maŭlaŭ, heta słovy, ź jakimi najčaściej sutykajecca moładź. I praviali fotasiesiju na fonie Leninskaha RUUS Minska.
«Padobny farmat akcyj — naš adkaz usioj hetaj kłaŭnadzie z zatrymańniami dziela zatrymańniaŭ, kali milicyi nie važna, chto na samoj spravie ŭdzielničaŭ u akcyjach. Hałoŭnaja meta — napałochać i zaniać łožak u CIP», — havorycca ŭ zajavie aktyvistaŭ. Hetyja akcyi jany nazvali apošnimi. «Zamiest taho, kab hulać u koški-myški ź milicyjaj, my vierniemsia da svaich pastajannych prajektaŭ i inicyjatyŭ, pakolki heta źjaŭlajecca nieadjemnaj častkaj supracivu».
U subotu, 10 studzienia, padčas pank-viečaryny ŭ minskim kłubie «Piraty» ŭvarvalisia bajcy śpiecpadraździaleńnia. Usich prysutnych źniali na kamieru, pierapisali ich dadzienyja i prymusili razyścisia. Try čałavieki byli zatrymanyja za raspaŭsiudžvańnie ekstremisckich materyjałaŭ. 16 studzienia prajšła akcyja padtrymki aryštavanych, paśla jakoj zatrymali jašče dvaich aktyvistaŭ.
