«Bresckija zubry» ŭpieršyniu ŭ historyi biełaruskaha biejsboła ŭvajšli ŭ hrupu A — u lik 12 najmacniejšych kamand, jakija buduć zmahacca za hałoŭny trafiej Kubku Jeŭropy.
Foto vb.by
Jak paviedamiŭ hałoŭny trenier «Bresckich zubroŭ» Ihar Łukaševič, kamandy raździeleny na dźvie padhrupy.
Sapiernikami brestaŭčan buduć: Pirates Amsterdam (Niderłandy), PUC Paris (Francyja), T&A San Marino (San-Maryna), Solingen Alligators (Hiermanija), Fortitudo Bologna (Italija). Spabornictvy projduć 2—7 červienia ŭ Paryžy.
U hetyja ž dni ŭ Raterdamie (Niderłandy) buduć mierycca siłami jašče šeść kamand.
«Papadańnie ŭ hrupu A — pakazčyk imklivaha rostu biełaruskaha biejsboła ŭ apošnija hady.
Mara kožnaha hulca — zhulać u elicie jeŭrapiejskaha biejsboła. Spaborničać ź lepšymi kamandami hetych krain, kaniešnie, budzie niaprosta. Asabliva kali ŭličyć, što ŭ nas niama nivodnaha lehijaniera, — skazaŭ Łukaševič. — Naša kamanda maładaja, ale vielmi pierśpiektyŭnaja. My pastarajemsia zrabić usio mahčymaje, kab pakazać vydatny biejsboł i paradavać našych balelščykaŭ pieramohami».
«Bresckija zubry» — 12-razovyja čempijony krainy i 10-razovyja ŭładalniki Kubka Biełarusi pa biejsbole, nieadnarazovyja pieramožcy i pryziory mižnarodnych turniraŭ. U 2014 hodzie ŭ Breście kamanda stała pieramožcam kvalifikacyjnaha etapu Kubka Jeŭropy.
