Biełaruś vyjhravała paśla pieršaha tajma ź likam 12:7
U zaklučnym matčy hrupavoha raŭndu čempijanatu śvietu pa handbole, što prachodzić u Katary, biełaruskaja zbornaja prajhrała haspadaram spabornictvaŭ ź likam 22:26 (pieršy tajm biełarusy vyjhrali ź likam 12:7).
Zrešty, jašče da pačatku hulni padapiečnyja Juryja Šaŭcova zhubili navat tearetyčnyja šancy na 1/8 finału. Brazilcy pieramahli Čyli i vyjšli ŭ płej-of (bo pieramoha naščadkaŭ Ihnata Damiejki davała b šansy biełarusam).
Biełarusy finišujuć piatymi ŭ hrupie (adna pieramoha — nad Čyli — i čatyry parazy) i ŭ płej-of nie vychodziać (i, vidać, kvalifikacyjnuju hrupu Alimpijady-2016 — błakitnaja mara biełaruskaha handbołu).
Vynikovaje stanovišča: Ispanija — 10, Katar — 8, Słavienija — 6, Brazilija — 4, Biełaruś — 2, Čyli — 0.
Tym nie mienš biełaruskaja zbornaja praciahvaje hulać na čempijanacie śvietu: heta budzie tak zvany Prezidencki kubak — turnir dla kamandaŭ, što zaniali miescy z 17-ha pa 24-je.
U paniadziełak a 17-j biełarusy zhulajuć z kamandaj, što zaniała 5-je miesca ŭ hrupie «B».
Cikava, što heta budzie zbornaja Bośnii — supiernik biełarusaŭ pa adboračnym turniry da čempijanatu Jeŭropy — 2016.
29 kastryčnika 2014 h. kamandy na «Čyžoŭka-Arenie» zhulali ŭničyju (25:25), matč u Bośnii projdzie 10 ci 11 červienia. U hrupie da Jeŭra-2016 hulajuć taksama zbornyja Litvy i Danii.
Tut paśla dvuch turaŭ: Danija — 4, Biełaruś — 3, Bośnija — 1, Litva — 0.
