lady.tut.by
Pradukcyjnaść pracy na biełaruskich dziaržaŭnych pradpryjemstvach u paŭtara-dva razy nižejšaja, čym na pryvatnych.
Pra heta zajaviŭ pamočnik prezidenta Biełarusi pa ekanamičnych pytańniach Kirył Rudy padčas tradycyjnaj mižnarodnaj navukovaj kanfierencyi ŭ Minsku.
Kanfierencyja pravodzicca štohod z udziełam dziaržsłužačych i ekśpiertaŭ. Vystupleńni ŭdzielnikaŭ ciapierašniaj kanfierencyi, jakaja adbyłasia ŭ śniežni, apublikavanyja ŭ apošnim numary «Ekonomičieskoho biulletienia», jaki vydajecca NDEI Minekanomiki.
Jak adznačyŭ Kirył Rudy, dla zabieśpiačeńnia doŭhaterminovaha ekanamičnaha rostu ŭ Biełarusi važny taki pryjarytet, jak pavyšeńnie pradukcyjnaści pracy.
U pieršuju čarhu, padkreśliŭ pamočnik prezidenta, heta datyčycca pradpryjemstvaŭ z dolaj dziaržavy ŭ statutnym fondzie, jakija stvarajuć u krainie kala pałovy vałavoha dadadzienaha koštu.
«Pry hetym empiryčna paćviardžajecca, što pradukcyjnaść pracy na dziaržpradpryjemstvach u siarednim amal u paŭtara-dva razy nižejšaja, čym na pryvatnych (naprykład, pry paraŭnańni vyručki na adnaho rabotnika ŭ Biełarusi ŭ sielskaj haspadarcy, piŭnoj, rybnaj i inšych halinach)», — kanstatavaŭ pamočnik prezidenta.
U toj ža čas jon pryvioŭ prykład Kitaja, dzie pradukcyjnaść pracy ŭ kampanijach z zamiežnym kapitałam u čatyry razy vyšejšyja, čym u pryvatnych kitajskich kampanijach, i ŭ siem razoŭ vyšejšaja, čym u dziaržaŭnych.
«Pry hetym prablema navat nie ŭ technałohijach, jakija na pryvatnych i dziaržpradpryjemstvach časta madernizavanyja i padobnyja, a ŭ sistemie kiravańnia i matyvacyi», — ličyć Rudy.
Na jaho dumku, matyvacyjnyja miechanizmy dla biełaruskich dziaržpradpryjemstvaŭ mohuć zaklučacca va ŭkaranieńni kłasičnaj sistemy karparatyŭnaha kiravańnia, materyjalnaha stymulavańnia (u zaležnaści ad vypracoŭki i rašeńnia peŭnych zadač). «Adnym z rašeńniaŭ hetaj prablemy moža stać režym «svabodnaha płavańnia» dziaržpradpryjemstvaŭ (naprykład, za «bujkami» — peŭnymi značeńniami prybytku, rentabielnaści i hetak dalej)», — skazaŭ pamočnik prezidenta.