21 lutaha prezident Ukrainy Viktar Janukovič padpisaŭ pahadnieńnie, dziakujučy jakomu spadziavaŭsia pratrymacca va ŭładzie jašče niekalki miesiacaŭ, piša The New York Times, što praviała rasśledavańnie apošnich hadzin praŭleńnia Janukoviča va Ukrainie.
Ale prosta padčas pieramovaŭ «kiraŭniki palicyi i siłavych struktur śpiešna telefanavali deputatam-apazycyjanieram, vyrazna tłumačačy, što kłapociacca bolš pra svaju ŭłasnuju biaśpieku, čym pra abaronu Janukoviča i jaho ŭrada», śćviardžajuć žurnalisty Endru Chihins i Endru Kramier.
Da viečara taho ž dnia Janukovič pakinuŭ Kijeŭ. Rasija śćviardžaje, što Janukovič byŭ zrynuty ŭ vyniku hvałtoŭnaha pieravarotu, jaki padtrymlivaŭsia i navat byŭ zrežysiravany Zachadam.
The New York Times piša, što jaje rasśledavańnie pakazała: «prezident byŭ nie stolki skinuty, kolki kinuty na volu losu jaho ŭłasnymi sajuźnikami, a zachodnija aficyjnyja asoby byli ździŭlenyja hetym kracham nie mienš, čym usie astatnija».
Ucioki sajuźnikaŭ paskorylisia z pryčyny taho, što pratestoŭcy zachapili šmat zbroi, ale hetak ža važnuju rolu adyhrała panika va ŭradavych kołach z-za sprobaŭ Janukoviča pamirycca z supiernikami.
Na dośvitku 20 lutaha, u čaćvier, prajeŭrapiejski pratestny ruch kantralavaŭ usiaho niekalki sotniaŭ kvadratnych mietraŭ u centry Kijeva, piša hazieta. Ranicaj u toj ža dzień hrad kul raźbiŭ dziasiatki pratestoŭcaŭ.
Heta krovapralićcie vyklikała šok, jaki da viečara spravakavaŭ masavy sychod sajuźnikaŭ Janukoviča ŭ Radzie ŭ inšy łahier, a samoha Janukoviča zaachvociŭ ustupić u pieramovy z tryma apazycyjanierami, piša hazieta.
«Mienavita tady pačali pastupać zvanki ad aficeraŭ-siłavikoŭ, kaža adzin z deputataŭ-apazicyjanieraŭ Siarhiej Pašynski», — piša hazieta. Aficery prasili dać im eskort, kab jany mahli pakinuć Kijeŭ, dzie vulicy byli zaprudžanyja raźjušanymi pratestoŭcami.
U intervju haziecie aficery siłavych struktur skazali, što ich ustryvožyŭ zaklik rasśledavać zabojstva pratestoŭcaŭ, jaki ŭtrymlivaŭsia ŭ mirnym pahadnieńni. Jany aścierahalisia, što Janukovič hatovy kinuć na volu losu tych samych ludziej, jakija jaho achoŭvali.
Dniom 21 lutaha Kijeŭ pakinuła padraździaleńnie «Bierkuta» z Sumskaj vobłaści.
V.a jaho kamandzira, jaki paprasiŭ nazyvać jaho prosta «Uładzimir», skazaŭ, što 21 lutaha ŭsiu ranicu sprabavaŭ datelefanavacca da svajho načalstva ŭ MUS Ukrainy, kab atrymać ŭkazańni, ale telefony nie adkazvali.
U vyniku Uładzimir datelefanavaŭsia niejkamu čynoŭniku siaredniaha źviana ŭ MUS. «Atrymaŭšy paradu źjechać, bo «ŭsio načalstva biažyć», Uładzimir źviazaŭsia z Pašynskim i paprasiŭ eskort dla vyjezdu z horada», — piša hazieta. Jon rastłumačyŭ, što jamu nie zahadali źjazdžać, a prosta skazali, što jon i jaho padnačalenyja mohuć źjechać, kali pažadajuć.
Alaksandr Chadakoŭski ŭ lutym kamandavaŭ padraździaleńniem elitnaha śpiecnazu «Alfa», achoŭvajučy štab-kvateru ŭnutranaj raźviedki Ukrainy.
«My pačali razumieć, što centralnaha ŭrada nie budzie, što jon razvalvajecca», — uspaminaŭ Chadakoŭski ŭ niadaŭnim intervju ŭ Daniecku, dzie ciapier kamanduje bataljonam uzbrojenych prarasijskich sieparatystaŭ.
U elitnych padraździaleńniach milicyi «źmianiałasia atmaśfiera», skazaŭ Chadakoŭski. «Usie zrazumieli, što ŭrad nie źbirajecca prymać rašučyja miery. My zrazumieli, što nas abvinavaciać va ŭsich złačynstvach, jakija my ździejśnim, kali budziem čyścić płošču, pry apošnim dychańni staroha ŭrada», - rastłumačyŭ jon.
Akramia taho, siłavyja struktury panikavali z-za čutak, zaachvočvajucca samimi prysutnymi. Śćviardžałasia, što ŭ Kijeŭ viazuć sotni adzinak ahniastrelnaj zbroi, zachoplenych 18 lutaha u Lvovie.
Zachodnija dypłamaty, u tym liku pasoł ZŠA Džefry R. Pajet, aścierahalisia: kali heta zbroja apyniecca ŭ Kijevie, to pratestny ruch, jaki pačaŭsia jak mirny, pieratvorycca ŭ zbrojny i chutka zhubić hetyja simpatyi.
Uviečary 20 lutaha, kali pradstaŭniki jeŭrapiejskich krain viali ź Janukovičam pieramovy ab pieramirji, Pajet i niekalki jeŭrapiejskich pasłańnikaŭ sustrelisia z Andrejem Parubijem, kiraŭnikom sił biaśpieki pratestoŭcaŭ [kamiendant Jeŭramajdanu].
«My jamu skazali: «Nie dazvalajcie, kab heta zbroja trapiła ŭ Kijeŭ. Kali jana prybudzie, heta całkam źmienić situacyju», — uspaminaje Pajet.
Parubij ŭ niadaŭnim intervju admaŭlaŭ, što heta zbroja naohuł dabrałasia da Kijeva, ale dadaŭ, što pierśpiektyva jaje trapleńnia ŭ stalicu, mahčyma, stała mahutnym instrumientam nacisku i na Janukoviča, i na jeŭrapiejskija ŭrady.
«Ja ich pieraściaroh, što kali zachodnija ŭrady nie prymuć bolš ćviordych mier suprać Janukoviča, uvieś praces moža pryniać vielmi pahroźlivy razmach», — skazaŭ Parubij.
Andrej Ciareščanka, kamandzir «Bierkuta» z Daniecka, jaki tady znachodziŭsia razam sa svaimi padnačalenymi ŭ budynku Kabinieta ministraŭ u Kijevie, skazaŭ: 21 lutaha, prykładna ŭ 14 hadzin, jamu patelefanavaŭ namieśnik ministra ŭnutranych spraŭ Viktar Dubovik i zahadaŭ pakinuć horad. Pavodle słoŭ Ciareščanki, Dubovik źviazaŭ jaho z Pašynskim, a toj supravadziŭ Ciareščanku i jaho padnačalenych da haradskoj uskrainy.
Pašynski kaža, što arhanizavaŭ eskorty dla taho, kab horad pakinuli bolš za 5000 vajskoŭcaŭ siłavych padraździaleńniaŭ. Pavodle jaho słoŭ, jon nie viedaje, adkul pieršapačatkova pastupiŭ zahad ab adstupleńni.
Ina Bahasłoŭskaja, byłaja sajuźnica Janukoviča, skazała, što adstupleńnie siłavikoŭ było reakcyjaj na rezalucyju Rady, jakaja ŭviečary ŭ čaćvier «zahadała ŭsiamu składu ŭnutranych vojskaŭ i ŭsioj milicyi viarnucca ŭ kazarmy» (farmuloŭka haziety). Pavodle jaje słoŭ, Janukovič nie mieŭ inšaha vybaru, akramia jak zahadać siłavikam syści z vulic.
Pa słovach nabližanych, u piatnicu, 21 lutaha, kali prezidenckaja administracyja i rezidencyja pierastali achoŭvacca, Janukovič vyrašyŭ, što jamu lepš pakinuć Kijeŭ, prynamsi, na niekalki dzion.
«Kali achova vakoł prezidenckaj administracyi była źniataja, jamu daviałosia źjechać», — raspavioŭ Michaił Dobkin, jaki ŭ toj čas byŭ hubiernataram Charkaŭskaj vobłaści. U piatnicu ŭviečary Janukovič vyrašyŭ znajści prytułak u stalicy vobłaści, Charkavie.
«Jon patelefanavaŭ i skazaŭ: «Ja pryjedu siońnia ci zaŭtra»,— uspaminaje Dobkin, dadajučy, što Janukovič pradstaviŭ hetuju pajezdku na ŭschod jak čarhovy vizit ź inśpiekcyjaj i adčajna sprabavaŭ zrabić vyhlad, što «jon nikudy nie biažyć». Kab zachavać tvar, jon paprasiŭ Dobkina «vybrać niekalki zavodaŭ dla naviedvańnia».
Dobkin pasprabavaŭ arhanizavać vizit na Charkaŭski zavod «Turbaatam», ale jaho dyrektar, jaki raniej z radaściu pryniaŭ by prezidenta, ciapier nie chacieŭ mieć ničoha ahulnaha ź Janukovičam. Jak skazaŭ Dobkin, dyrektar navat admoviŭsia pahavaryć ź im pa telefonie.
Kali Dobkin sustreŭ prezidenta ŭ aeraporcie Charkava paśla apoŭnačy, toj, zdavałasia, nie panikavaŭ, abo navat nie ŭśviedamlaŭ ŭsioj surjoznaści situacyi.
«Jamu zdavałasia, što heta časovyja ciažkaści», — uspaminaje Dobkin, apisvajučy prezidenta jak «čałavieka ź inšaj płaniety», jaki vieryŭ, što ździełka pry pasiarednictvie Jeŭropy mahła b dać uciačy z hodnaściu ŭ kancy hoda.
Pa słovach Dobkina, Janukovič nie razumieŭ, što pahadnieńnie ab daterminovych vybarach i inšych sastupkach nie harantuje jaho ščaślivaj budučyni, a chutčej źjaŭlajecca sihnałam sajuźnikam pra toje, što para pierachodzić na druhi bok.
«Kali lidar pierastaje być lidaram, usie, chto jaho akružaje, adychodziać ad jaho, — skazaŭ Dobkin. — Takoje praviła». I dadaŭ: «Pradać svoječasova — heta nie zdrada, a pradbačańnie».
Hvałt, jaki ŭzrušyŭ Kijeŭ za niekalki dzion da adjezdu Janukoviča, niečakana spyniłasia, jak tolki jon pakinuŭ horad. Ranicaj u subotu, 22 lutaha, pratestoŭcy, ździŭlenyja adsutnaściu palicyi na vulicach, zaniali budynak prezidenckaj administracyi, rezidencyju Janukoviča i inšyja raniej nieprystupnyja budynki. Jany spakojna ŭvajšli ŭ ich praz hałoŭnyja ŭvachody.
Praź niekalki hadzin, u miełanchaličnym televizijnym zvarocie z Charkava — apošnim pierad uciokami ŭ Rasiju — Janukovič nastojvaŭ na tym, što jon zastajecca prezidentam krainy, raspaviadaŭ pra napad na jaho mašynu i pra zdradu pierabiežčykaŭ.
«Jany zdradniki, - skazaŭ jon. — Ja nie chaču kazać pra ich. Ja nie chaču nazyvać imionaŭ. Niachaj heta zastaniecca na ich sumleńni i ŭ ich adkaznaści».
