Śviaty Sinod Ukrainskaj pravasłaŭnaj carkvy Kijeŭskaha patryjarchata razhledzieŭ pavodziny jepiskapa Užharadskaha i Zakarpackaha Kiryła.
Śviatary adreahavali na apublikavanyja ŭ Fejsbuku zdymki jepiskapa, jaki padčas znachodžańnia ŭ zonie ATA trymaŭ u rukach aŭtamat i artyleryjski snarad.
Pavodle apublikavanych u ŚMI tłumačeńniaŭ Kiryła, jon «staŭ vajarom Chrysta» i «asabista pasłaŭ nieludziam Pucina niekalki bojekamplektaŭ, jak pakarańnie za akupacyju ŭkrainskaj ziamli».
UPC paličyła takija dziejańni hrubym parušeńniem kananičnych praviłaŭ, jakija zabaraniajuć śviataram brać u ruki śmiarotnuju zbroju.
Carkva pastanaviła zabaranić Kiryłu udzielničać u bohasłužeńniach da poŭnaha pakajańnia.
U rašeńni Sinoda padkreślivajecca, što śviatary mohuć znachodzicca siarod vajskoŭcaŭ vyklučna dla akazańnia duchoŭnaj i dabračynnaj materyjalnaj dapamohi.
