U hetym hodzie kala centralnaj navahodniaj jołki na płoščy Pieramohi ŭ Viciebsku buduć dziažuryć kruhłasutkava. Hetaja miera źjaŭlajecca navinoj u zvykłym scenary pracy pravaachoŭnych orhanaŭ u pieradśviatočnyja i śviatočnyja dni, paviedamiŭ karespandentu BiełTA namieśnik načalnika milicyi hramadskaj biaśpieki UUS Viciebskaha abłvykankama Ihar Skarynovič.
Nad hałoŭnaj navahodniaj jołkaj Viciebska ŭ 2010 hodzie Siarhiejem Kavalenka byŭ uźniaty nacyjanalny bieł-čyrvona-bieły ściah.
Fota — Siarhiej Sierabro
Dla zabieśpiačeńnia hramadskaha paradku i biaśpieki hramadzian, a taksama ŭpłyvu na apieratyŭnuju abstanoŭku ŭ kaladnyja i navahodnija śviaty kiravańniem pryniaty arhanizacyjnyja miery. U pryvatnaści, asabisty sastaŭ orhanaŭ unutranych spraŭ pieraviedzieny na ŭzmocnieny varyjant niasieńnia słužby z 24 śniežnia pa 8 studzienia, arhanizavana rabota ŭzmocnienych śledča-apieratyŭnych hrup. Zabiaśpiečana achova hramadskaha paradku ŭ miescach prodažu jołak, a taksama zachavanaść alej, jakija rastuć kala administracyjnych budynkaŭ.
Z 24 śniežnia hetaha hoda pa 13 studzienia 2015-ha na terytoryi vobłaści bolš čym u 650 miescach zapłanavana praviadzieńnie masavych mierapryjemstvaŭ, pryśviečanych kaladnym i navahodnim śviatam. Placoŭki abśledujucca na adpaviednaść patrabavańniam biaśpieki supracoŭnikami milicyi sumiesna z pradstaŭnikami miascovych vykanaŭčych i rasparadčych orhanaŭ, MNS, inšych zacikaŭlenych viedamstvaŭ. Na achovie hramadskaha paradku padčas mierapryjemstvaŭ buduć zadziejničany supracoŭniki orhanaŭ unutranych spraŭ i vajennasłužačyja ŭnutranych vojskaŭ MUS.
«Akramia taho, realizujecca kompleks mierapryjemstvaŭ pa vyjaŭleńni faktaŭ niezakonnaha abarotu piratechničnych vyrabaŭ i inšyja dziejańni ŭ adpaviednaści z patrabavańniami, što pradjaŭlajucca da zabieśpiačeńnia hramadskaj biaśpieki. Milicyja rehijonu hatovaja da pracy padčas kaladnych i navahodnich śviatočnych mierapryjemstvaŭ. I my raźličvajem na razumieńnie z boku hramadzian pa vykanańni našych patrabavańniaŭ. U miescach śviatočnych mierapryjemstvaŭ kateharyčna zabaraniajecca mieć pry sabie zbroju i jaho imitacyi, pranosić z saboj piratechniku, śpirtnyja i inšyja napoi ŭ peŭnaj tary i samim być u stanie ałkaholnaha abo narkatyčnaha apjanieńnia, karystacca zabaronienaj simvolikaj», — dadaŭ Ihar Skarynovič.
