My prajšlisia pa abmiennych punktach ad płoščy Pieramohi da Jakuba Kołasa, kab vyśvietlić ci možna siońnia nabyć sotku-druhuju dalaraŭ ci jeŭra. Adkazvajem — možna! Ale mała dzie.
U bolšaści bankaŭ adkazvajuć koratka: ničoha niama. Ni «Choŭm kredyt bank», ni «Biełaruski narodny» na płoščy Pieramohi, ni «Biełhazprombank» kala Čyrvonazorkavaj ničym nam nie dapamhli. U abmieńniku «Fransabanka» kala «Akijana» — taksama pusta. Na pytańnie, kali źjavicca, kasirka davoli ahresiŭna skazała: «Jak ludzi zdaduć, dyk adrazu i źjaviacca».
Toje ž samaje i ŭ kasach «MTBanka». «Dla prodažu nie pryvoziać», — kažuć supracoŭniki.
Niama ničoha i ŭ «Biełarusbanku» kala Kazłova. Praŭda, tam adminstratarka paviedamiła, što chutka niešta pavinna pryvieźci, adnak kolki i kali — jana viedaje. Dakładna tolki, skazała žančyna, što kali i pryviazuć, to nie siońnia.
Ale valutu zdabyć usio ž mahčyma. Dla hetaha jość dva šlachi. Pieršy — stajać la kasaŭ i čakać, kali niechta budzie zdavać. Tut užo jak vam pašancuje. Naprykład, u «VTB» banku nie było ni dołaraŭ, ni jeŭra, adnak adrazu niekalki čałaviek u čarzie adhuknulisia: «My zdajom!». Adzin zdavaŭ 50, druhi — krychu bolš.
Varyjant numar dva — prajścisia pa ŭsim abmieńnikach zapar. Tak, naprykład, u niekatorych bankach znachodziłasia pa 50-100 jeŭra ŭ kožnaj kasie. Naprykład, u «BPS-Śbierbanku» my znajšli 50 jeŭra i 50 dołaraŭ u adnoj kasie, 10 dołaraŭ u druhoj i adkaz «ničoha niama» ŭ treciaj.
A voś u dvuch nieprykmietnych abmieńnikach kala CUMa valuty było trošački bolš. Technabank prapanavaŭ nabyć 1000 jeŭra (praŭda, dołaraŭ tam amal nie znajšłosia, tolki dziasiatka). U raźmieščanym pobač akiency banku «BiełVEB» kasir paviedamiŭ, što z valutaj prablem niama. Na pytańnie, ci zmahu ja nabyć 1000 jeŭra i 1000 dołaraŭ, adkazaŭ: «Kaniečnie».
