Infarmacyja pra hramadzian Biełarusi, ukazanych u śpisie ŭdzielnikaŭ ukrainskaha bataljona «Danbas», praviarajecca, paviedamiŭ BiełaPAN pres-sakratar KDB Artur Strech.
«Danbas» — dobraachvotnicki bataljon u składzie Nacyjanalnaj hvardyi Ukrainy, sfarmavany ŭ krasaviku 2014 hoda pieravažna z žycharoŭ Ukrainy dla procidziejańnia ŭzbrojenym farmiravańniam samaabvieščanaj Danieckaj narodnaj respubliki.
«Prafiłaktyčnuju pracu pa niedapuščeńni ŭciahvańnia biełaruskich hramadzian u vajennyja kanflikty na terytoryi inšych dziaržaŭ tak ci inakš pravodziać usie pravaachoŭnyja orhany Biełarusi. Situacyja imi kantralujecca», — skazaŭ Strech.
Ad kamientaryjaŭ nakont Dźmitryja Pałojki, zatrymanaha 11 śniežnia ŭ Baranavičach paśla viartańnia z Ukrainy, Strech admoviŭsia.
Jak paviedamlałasia raniej, žychar Baranavič Pałojka byŭ zatrymany 11 śniežnia na vakzale. Pavodle infarmacyi pravaabarončaha sajta www.spring96.org, Dźmitryja asudzili na 10 sutak pavodle abvinavačvańnia ŭ drobnym chulihanstvie i źmiaścili ŭ śledčy izalatar. Zhodna sa źviestkami pravaabaroncaŭ, milicyja vyklikaje na dopyty jaho svajakoŭ, čaho zvyčajna nie robicca, kali čałaviek abvinavačany ŭ drobnym chulihanstvie.
15 śniežnia vyśvietliłasia, što Pałojka značycca ŭ apublikavanych na sajcie «KibierBierkut» śpisach bataljona «Danbas». Akramia Pałojki tam jašče piać proźviščaŭ hramadzian, miescam naradžeńnia jakich ukazanaja Biełaruś.
Pravieryć sapraŭdnaść śpisaŭ zaraz niemahčyma. Śpisy zroblenyja ŭ farmacie tablicy Exell i ŭtrymlivajuć układki «Štat 09.2014», «Kadry», «Dobraachvotniki», «Kamandziroŭki», «Mir», «Papaŭnieńnie», «Kijeŭ» i «Ankieta». U raździele «Kadry» jość proźviščy čatyroch mužčyn, miescam naradžeńnia jakich ukazanaja Biełaruś, jany prypisanyja da biełaruskich vajenkamataŭ, ich uzrost ad 35 da 41 hoda. Jašče ŭ adnaho zhadanaha ŭ śpisie, 1990 hoda naradžeńnia, miescam naradžeńnia ŭkazanaja Biełaruś, ale jon prypisany da vajenkamata ŭ Kijevie. Šosty mužčyna, 1972 hoda naradžeńnia, naradziŭsia ŭ Biełarusi, adnak źviestak pra miesca jaho pražyvańnia i prypiski da vajenkamata niama.
BiełaPAN źviazaŭsia pa telefonie z adnym ź biełarusaŭ, jaki taksama słužyć u bataljonie «Danbas», znajomy ź Dźmitryjem Pałojkam i znachodzicca ŭ Maryupali (jaho proźvišča jość ŭ rasparadžeńni redakcyi).
«Ja dumaju, zatrymańnie Pałojki źviazanaje z tym, što jon maje dačynieńnie da «Danbasa», — skazaŭ surazmoŭca ahienctva. — U mianie jość aściaroha, što praktyka budzie raspaŭsiudžanaja na ŭsich, chto budzie viartacca ŭ Biełaruś. Maim svajakam taksama telefanavali i cikavilisia, dzie ja znachodžusia». Pavodle słoŭ surazmoŭcy, Pałojka «ŭ niejkich sur`ioznych bitvach nie ŭdzielničaŭ i niekalki razoŭ z krasavika pryjazdžaŭ u Biełaruś».
Na pytańnie, čamu biełarusy jeduć va Ukrainu na nie svaju vajnu, jon adkazaŭ: «Adnojčy chapiła mužnaści sieści na ciahnik i pryjechać. Raskazvać padrabiazna pra svajo žyćcio va Ukrainie nie budu, heta ž artykuł na mianie». Pavodle słoŭ surazmoŭcy, u budučyni jon płanujecca viarnucca ŭ Biełaruś. Jon taksama adznačyŭ, što biełarusy, uciahnutyja ŭ bajavyja dziejańni va Ukrainie, faktyčna nie abaronienyja ni ŭ Biełarusi, ni va Ukrainie.
- Jašče adzin biełarus, ukazany ŭ śpisie, zajaviŭ BiełaPAN, što nie maje nijakaha dačynieńnia da bataljona «Danbas».
«Ja žyvu va Ukrainie, ja vychadziec ź Biełarusi, — skazaŭ jon. — Adnak mnie niezrazumieła, jak u hety śpis trapili maje źviestki. U dziejańniach nijakich bataljonaŭ ja nie ŭdzielničaŭ. Ja viadu naohuł spakojnaje žyćcio, nie ŭdzielničaju ni ŭ jakich bataljonach, ni palityčnych padziejach. Ja nie viedaju, kudy mnie źviarnucca, kab paŭpłyvać na situacyju».
Pres-sakratar MZS Biełarusi Dźmitryj Mirončyk paviedamiŭ BiełaPAN, što pavodle daručeńnia biełaruskaha źniešniepalityčnaha viedamstva pasolstvam u Kijevie «z kiraŭnictvam MUS Ukrainy i inšych upaŭnavažanych struktur dasiahnutaja damoŭlenaść ab nieadkładnym davańni ŭkrainskim bokam infarmacyi pra biełaruskich hramadzian, jakija ŭdzielničajuć u bajavych dziejańniach na paŭdniovym uschodzie Ukrainy, a taksama pra tych, chto apynulisia ŭ prablemnych situacyjach u suviazi sa stanoviščam u hetym rehijonie». «Na hety čas jakoj-niebudź infarmacyi ad ukrainskaha boku nami nie atrymana», — skazaŭ Mirončyk.
