U stalicy Kazachstana Saryarkinski rajonny sud №2 pačaŭ razhlad pa kryminalnaj spravie ŭ dačynieńni da 30-hadovaha hramadzianina Kazachstana Jaŭhiena Udavienki, jaki vajavaŭ na baku łuhanskich sieparatystaŭ na ŭschodzie Ukrainy.
Pra heta ŭ piatnicu, 12 śniežnia, paviedamlaje kazachstanski partał Nur.kz.
Pavodle abvinavaŭčaha prysudu, Udavienka ŭdzielničaŭ u bajach na ŭschodzie Ukrainy, užyvaŭ zbroju, achoŭvaŭ błokpasty, patrulavaŭ Łuhansk i vykonvaŭ inšyja daručeńni. Takim čynam abvinavačvany, jaki źjaŭlajecca hramadzianinam Kazachstana, «naŭmysna i niepravamierna ŭdzielničaŭ u bajavych dziejańniach na terytoryi zamiežnaj dziaržavy», što źjaŭlajecca złačynstvam pavodle kazachstanskaha Kryminalnaha kodeksu.
Pa słovach prakurora Daŭrena Ašymava, paśla padziej u Adesie ŭ mai 2014 hoda Udavienka vyrašyŭ pajechać va Ukrainu i vajavać na baku sieparatystaŭ. Z dapamohaj «Vkontaktie» jon źviazaŭsia z asobami, nie ustalavanymi śledstvam, i 25 maja vyjechaŭ ciahnikom z Astany va Uralsk. Paśla hetaha Udavienka pierasiok miažu, dajechaŭ da Samary, a adtul da Rastova-na-Donie.
Dalej Udavienka dałučyŭsia da hrupy, jakaja składałasia prykładna z 30 čałaviek, i razam ź joj naŭmysna i niezakonna pierasiok miažu Rasii i Ukrainy, paśla čaho adpraviŭsia ŭ Łuhansk dla prachodžańnia kursu pieršapačatkovaj vajennaj padrychtoŭki.
Abvinavačvany častkova pryznaŭ svaju vinu. Pry hetym na pasiadžeńni suda jon admaŭlaŭ jaki-niebudź namier ŭ ździajśnieńni złačynstva.
«Nie zabivaŭ, nie padryvaŭ. Pierastrełki byli, ale ja daloki ad hetaha, navat u vojsku nie słužyŭ. Mnie strašna było», — zajaviŭ jon. Udavienka adznačyŭ, što rašeńnie vajavać za sieparatystaŭ pryniaŭ samastojna i nikomu pra heta nie paviedamiŭ.
«Nam tłumačyli, tym, chto nie słužyŭ u vojsku, niby techniku biaśpieki, kab my nie vysoŭvali hałovy, nie nastupali na miny, pakazvali, jak vyhladajuć miny. Paśla čaho pajechali ŭ horad Łuhansk. Tam ja byŭ niedzie miesiac. Horad byŭ akružany z troch bakoŭ. U samym Łuhansku raznosili paru razoŭ humanitarku, tušyli pažar, łavili dyviersantaŭ», — raspavioŭ abvinavačvany.
Pa słovach Udavienki, jon znachodziŭsia va Ukrainie prykładna 70 dzion, paśla čaho zachvareŭ na branchit i vyrašyŭ viarnucca dadomu. Z kastryčnika jon znachodzicca pad aryštam.
Pa artykule 163 Kryminalnaha kodeksa Kazachstana, za najmictva možna atrymać turemny termin až da pažyćciovaha. Taksama, zhodna z hetym artykułam, złačynstvam źjaŭlajecca niepravamierny ŭdzieł va ŭzbrojenych kanfliktach abo vajennych dziejańniach na terytoryi zamiežnaj dziaržavy, navat kali prykmiet najomnictva nie było. Za heta złačynstva možna atrymać pakarańnie ŭ vyhladzie pazbaŭleńnia voli terminam da siami hadoŭ.
