15 śniežnia sud Centralnaha rajona Miensku pakaraŭ aktyvista hramadzkaha abjadnańnia «Alternatyva» Alaksieja Šubaru aryštam na siem sutak za pikiet suprać palityki Pucina.
Alaksiej Šubara, fota z Fejsbuka Aleha Korbana
Sudździa Natalla Vajcechovič pryznała jaho vinavatym u parušeńni zakanadaŭstva ab masavych mierapryjemstvach.
Śviedkami na sudzie vystupili supracoŭniki Centralnaha RUUS Miensku Hryzienka i Korzun, jakija zatrymlivali aktyvista, paviedamlaje spring96.org.
Alaksiej Šubara byŭ zatrymany 12 śniežnia ŭ Miensku la Kastryčnickaj płoščy, dzie jon pravodziŭ adzinočny pikiet. Aktyvist byŭ ź bieł-čyrvona-biełym ściaham i plakatam «Ludzi, treba terminova spynić Pucina. Nie III suśvietnaj vajnie». Takim čynam jon vykazvaŭ pratest suprać palityki prezydenta Rasiei Ŭładzimiera Pucina.
Vychodnyja da sudu aktyvist pravioŭ u Centralnym RUUS Miensku.
Kiraŭnik hramadzkaha abjadnańnia «Alternatyva» Aleh Korban paviedamiŭ, što ŭ izalatary Alaksiej zachvareŭ, bo tam choładna zranicy, a paścielnuju bializnu i pokryva jamu nie vydavali.
Pavodle Korbana, Alaksiej Šubara vyjšaŭ u centar Miensku, «kab vykazać svajo mierkavańnie pra palityku Kramla, rasiejska-ŭkrainski kanflikt».
«Alaksiej Šubara — zvyčajny chłopiec, žyvie ŭ zdymnaj kvatery na vulicy Anharskaja. Pracuje ŭ budaŭničaj firmie, bolš-mienš zarablaje na žyćcio, maje siamju (vychoŭvaje małaletniaje dzicia). Paŭtara hady tamu dałučyŭsia da šerahaŭ «Alternatyvy», niekalki razoŭ braŭ udzieł u akcyjach, ale ŭsio abychodziłasia bieź pieraśledu ŭładaŭ».