U červieni 2014 hoda West Games, štat jakoj naličvaje 11 čałaviek, abvieściła ab raspracoŭcy Areal, «duchoŭnaha naščadka» papularnaj sieryi hulniaŭ «S.T.A.L.K.E.R», i pačała zbor hrošaŭ. Placoŭka Kickstarter u chutkim časie zakryła zbor hrošaŭ biez tłumačeńniaŭ. Raspracoŭščyki Areal patłumačyli heta skandałami z kankurentami i dziejańniami nienaviśnikaŭ z Rasii.
Inšyja eks-raspracoŭščyki «S.T.A.L.K.E.R», kampanija Vostok Games, abvinavaciła West Games u machlarstvie. Vostok raspracoŭvajuć ułasnaha «naščadka Stałkiera» pad nazvaj «Survarium».
Zaraz West Games zapuściła kampaniju pa zboru srodkaŭ na novuju hulniu ŭžo nie na papularnym Kickstarter, a na mieniej viadomym World Wide Funder. Kampanija prosić užo nie miljon dalaraŭ, a 600 tysiač. Hulnia ciapier zaviecca «Stalker Apocalypse», ale rabicca jana budzie pa napracoŭkach «Areal».
Raspracoŭščyki abiacajuć zrabić hulniu na hrafičnym ruchaviku Unreal Engine 4 i adaptavać jaje dla Windows, MacOS, Xbox One i Playstation 4.
Kampanija pa zbory srodkaŭ skončvajecca 12 sakavika 2015 hoda. U vypadku pośpiechu vychad «Stalker Apocalypse» płanujecca na žnivień 2016 hoda.
U «Stalker Apocalypse» hulca buduć čakać zakinutyja terytoryi, niebiaśpiečnyja mutanty, anamalii, bai ź niešmatlikimi ludźmi, mnostva transpartu. Čakajecca taksama padtrymka šlema virtualnaj realnaści Oculus Rift.
***
Sieryja hulniaŭ «S.T.A.L.K.E.R» sumna viadomaja, ale lubimaja hulcami. Ab płanach pa raspracoŭcy hulni pa matyvach apaviadańnia «Piknik na ŭzbočynie» bratoŭ Struhackich było abvieščana jašče ŭ 2001 hodzie. Data vychada hulni šmat razoŭ mianiałasia, a sama hulnia paśpieła źmianić ruchavik, nazvu i vydaŭca. U vyniku ŭ 2007 hodzie vyjšła hulnia «S.T.A.L.K.E.R: Cieni Čarnobyla», u jakuju nie trapili mnohija abiacanyja mahčymaści (u tym liku adkryty suśviet). Hulnia atrymała pazityŭnyja vodhuki jak u postsavieckich krainach, tak i na Zachadzie, ale papularnaj była pieravažna ŭ Rasii, Biełarusi i Ŭkrainie. U 2008 i 2009 hodzie sieryja papoŭniłasia hulniami «Čystaje Nieba» i «Klič Prypiaci». Raspracoŭka «S.T.A.L.K.E.R 2» była abvieščanaja ŭ 2010 hodzie, ale spynienaja ŭ kancy 2011-ha praz zakryćcio studyi-raspracoŭščyka GSC Game World. Pravy na brend zastalisia ŭ zasnavalnika GSC Siarhieja Hryharoviča. Ab raspracoŭcy «naščadka Stałkiera» abvieścili dźvie kampanii, supracoŭniki jakich majuć dačynieńnie da aryhinalnaha «Stałkiera». Fanaty tymčasam robiać madyfikacyju «Lost Alpha», jakaja viartaje ŭ aryhinalnyja «Cieni Čarnobyla» ŭsie abiacanyja, ale nie realizavanyja mahčymaści.
