Chvala pratestaŭ prakaciłasia pa Francyi paśla taho, jak Vyšejšy administracyjny sud krainy zabaraniŭ batlejku, jakuju tradycyjna rabili ŭ pamiaškańni meryi horada Ła-Roš-siur-Jon, paviedamlaje sajt catholicnews.org.ua.
Sud paličyŭ, što kaladnaja batlejka ŭ meryi «pahražaje relihijnaj niejtralnaści» dziaržavy, adnak hetaje rašeńnie vyklikała advarotny vynik — batlejki pačali rabić u meryjach mnohich inšych haradoŭ, u jakich ich raniej nie ŭstaloŭvali.
Mnohija kiraŭniki haradoŭ i orhanaŭ miascovaha samakiravańnia zajavili, što sceny ź fihurkami Dzievy Maryi, Śviatoha Jazepa i małoha Jezusa ŭ jaślach adlustroŭvajuć chryścijanskuju hlebu francuskaj kultury.
Apytańnie, jakoje praviała hazieta Le Parisien, śviedčyć, što 86% z apytanych 12 tysiač jaje čytačoŭ chočuć zachavać batlejki ŭ dziaržaŭnych ustanovach.
Druhi čałaviek u apazicyjnaj pravacentrysckaj partyi UMP Natali Kaściuška-Maryze, praŭnučka Tadevuša Kaściuški, zajaviła, što prychilniki adździaleńnia relihii ad dziaržavy nie pavinny być takimi ahresiŭnymi.
«Nie treba praciahvać relihijnyja vojny vojnami za siekularyzm», — skazała jana, piša telegraph.co.uk.
Ła-Roš-siur-Jon znachodzicca na zachadzie Francyi ŭ tradycyjna katalickaj pravincyi Vandeja, jakaja ŭ časy Francuzskaj revalucyi paŭstała suprać Paryža ŭ značnaj stupieni z-za antykatalickich represij novych uładaŭ. Padčas bajoŭ pamiž miascovymi paŭstancami i ŭradavymi vojskami horad byŭ amal źniščany.
