Pavažanaja Redakcyja, pišu vam z nahody dadzienaj situacyi, bo šmat mierkavańniaŭ, chaču, kab čytačy daviedalisia, jak usio było, chaču źviazacca sa svaimi kalehami, u jakich byli padobnyja vypadki, i tak dajści da iściny i vyznačyć, chto dapuściŭ fatalnuju pamyłku.
Kali łaska, apublikujcie moj adkaz maksimalna dasłoŭna, dajcie spasyłku na maju elektronnuju skryniu, kab čytačy mahli źviazacca sa mnoj, tak vy dapamožacie zrabić našu miedycynu jašče bolš efiektyŭnaj. Zahadzia vielmi ŭdziačny za vašu dapamohu.
Ja chirurh Dubrovienskaj CRB Kiryčenka Ju.D.
Moj list adrasavany šyrokamu kołu čytačoŭ, a nie tolki maim kaleham-miedykam, tamu prafiesijnaj leksiki tut minimalna, kab było zrazumieła.
U paniadziełak (28.07.14) źviarnuŭsia da mianie na pryjom a 14.00 dnia Staś u supravadžeńni jaho ciotki. Dzicia skardziłasia na bol u vobłaści kiści i levaha pieradplečča.
25.07.14 u piatnicu jon atrymaŭ traŭmu levaj ruki, pierałom pramianiovaj i łokcievoj kości levaha pieradplečča sa zrušeńniem. Dapamoha akazvałasia ŭ traŭmatałahičnym adździaleńni Aršanskaj haradskoj balnicy. Zroblena supastaŭleńnie kaściavych adłomkaŭ, nakładzienaja hipsavaja paviazka-łanhieta pad narkozam. Dzicia było adpuščana dadomu z rekamiendacyjami źjavicca na pryjom u paniadziełak, kab zrabić kantrolny zdymak.
Ja ŭvažliva vysłuchaŭ skarhi dziciaci, ahledzieŭ jaho ruku, adznačaŭsia aciok skury, bol u vobłaści kiści i pieradplečča. Koler skuravych pakrovaŭ nie byŭ źmienieny. Skura była navobmacak ciopłaj. Pulsacyja sasudaŭ vyznačałasia.
Ale stan kiści mianie krychu naściarožyŭ: doŭha zachoŭvaŭsia bol i aciok kiści. Tut pierada mnoj stała dva pytańni: asłabić hipsavuju paviazku, bo zachoŭvaŭsia bol, ci nie čapać jaje, bo heta mahło pryvieści da zrušeńnia adłomkaŭ. Z ulikam taho, što puls na sasudach pieradplečča vyznačaŭsia, skura była bledna-ružovaha koleru, ruch palcaŭ ruki byŭ zachavany, mnoj było vyniesiena rašeńnie: lačeńnie hipsavaj paviazkaj praciahnuć. Bol i aciok paśla traŭmy mohuć zachoŭvacca da 5 dzion, takoje było ŭ mianie ŭ praktycy nieadnarazova. Ja pryznačyŭ kantrolny zdymak u toj ža dzień, h.zn. u paniadziełak. Kaścianyja adłomki byli supastaŭlenyja dobra. Rekamiendavaŭ dziciaci ŭzvyšanaje stanovišča kaniečnaści, pryjom supraćzapalenčych abiazbolvalnych srodkaŭ, pry paharšenni stanu abo pry zachavańni bolu paŭtorna źjavicca da chirurha ŭ aŭtorak, na nastupny dzień.
U aŭtorak a 14.10 Stas sa svajoj ciotkaj źjavilisia na pryjom. Skarhi byli raniejšyja, bol u ruce nie pamienšyŭ, aciok kiści zachoŭvaŭsia, pulsacyja sasudaŭ vyznačałasia. Ruka była ŭ takim ža stanie, jak i ŭ paniadziełak.
Z ulikam zachavańnia bolu ja vyrašyŭ nie bajacca zrušeńnia adłomkaŭ i pasłabiŭ hipsavuju paviazku, pašyryŭ jaje. Stas adznačyŭ, što bol u ruce asłab. Lačeńnie pasłablenaj hipsavaj paviazkaj vyrašana było praciahnuć, rekamiendavana było źjavicca na pryjom pry zachavańni abo ŭzmacnieńni bolu ŭ luby čas.
U sieradu 30.07.14 u 14.30 Stas zajšoŭ sa svajoj ciotkaj. Stas skardziŭsia, što ruka mocna zaciakła, bol uzmacniŭsia, paharšeńnie stanu adznačyŭ ź viečara 29.07.14, h.zn. z aŭtorka.
Była źniataja hipsavaja łanhieta, kiść i pieradplečča byli ciomnaha koleru, aciakli, chałodnyja navobmacak. Pulsacyja sasudaŭ adsutničała. Palcy nie ruchalisia. Stan rascenieny jak hanhrena pieradplečča ŭ vyniku trambozu arteryj. Dzicia adpraŭlena było ŭ Aršanskuju balnicu i ŭ Viciebskuju abłasnuju balnicu.
Ja šmat razvažaŭ nad hetym vypadkam, analizavaŭ i asensoŭvaŭ jaho, bol u dušy viadoma ž jość.
Ja ŭ chirurhii 37 hadoŭ. Maju aściarohi, što ja sutyknuŭsia ź vielmi redkaj patałohijaj, paćvierdzili pracy viadomych miedykaŭ: M.V. Kuzina, A.M. Kličaŭskaha, P.N. Frałova, Ju.Z. Hrošava, M.V. Źvioździnaj…
Možna pryvieści statystyku: sindrom zdušeńnia ad hipsavaj paviazki ŭ dziaciej nie apisany ŭ miedycynskaj litaratury. Vielmi redkaja patałohija. 20% maje miesca zdušeńnie ruk, 80% — noh, ale heta pry avaryjach, katastrofach, ziemlatrusach, a nie paśla nakładańnia hipsavych paviazak. Statystyki pry nakładańni hipsavych paviazak niama.
Abapirajučysia na apisanyja vyšej pieršakrynicy, sindrom praciahłaha zdušeńnia raźvivajecca takim čynam, što praz 6—15 hadzin zdušeńnia tkanak hipsavaj paviazkaj nastupajuć niezvarotnyja źmieny ŭ tkankach, a mienavita ŭ ciahlicach, klinika jakich burna narastaje paśla źniaćcia hipsavaj paviazki: narastaje aciok, zdušvajucca sasudy, nadychodzić hanhrena, heta i adbyłosia ŭ situacyi sa Stasiem. Da mianie pacyjent upieršyniu źviarnuŭsia praz 60 hadzin paśla nakładańnia hipsavaj paviazki.
Paśla ŭźniknieńnia vilhotnaj hanhreny, u adpaviednaści ź miedycynskaj litaraturaj, možna było pasprabavać vyratavać ruku, vykarystoŭvajučy štučnuju nyrku, hiemadyjaliz, śpiecyfičnyja adsarbienty. Lačeńnie takich chvorych niemahčyma ŭ CRB. Tamu dzicia było nakiravana ŭ abłasny centr.
Dadzieny vypadak zasłuhoŭvaje pilnaj uvahi. Tut usio ž byŭ źbieh abstavinaŭ: hips nakłali ŭ piatnicu, a napieradzie było dva vychadnyja, kali byli b napieradzie pracoŭnyja dni, usio było b mahčyma zusim inakš.
Pavažanyja čytačy, davajcie ŭsie ŭvojdziem u hetuju situacyju, bo dadzieny vypadak paŭpłyvaŭ na los junaha čałavieka!
Davajcie kiravacca spraviadlivaściu i tolki tak my zrobim našu miedycynu jašče lepšaj, a nie pryncypam: «Chto apošni, taho i tapki»!
Ja nie sprabuju schavacca, uciačy, admachnucca! Ja chaču spraviadlivaści! Ale čužuju pamyłku na siabie ja brać nie budu!
Prašu maich kalehaŭ: chirurhaŭ, traŭmatołahaŭ vykazać svajo mierkavańnie z nahody dadzienaha vypadku i dadzienaj patałohii: sindromu praciahłaha zdušeńnia. Zahadzia dziakuju! Dasyłajcie svaje adkazy na elektronnuju skryniu.
