Pinskim mižrajonnym adździełam Śledčaha kamiteta raspačata sprava na padstavie č. 1 art. 339 KK (chulihanstva) u dačynieńni da 22-hadovaha žychara Pinska, jaki nidzie nie pracuje.
Jak paviedamiła aficyjny pradstaŭnik upraŭleńnia Śledčaha kamiteta pa Bresckaj vobłaści Maryna Drańkova, viečaram 27 listapada ŭ Pinsku małady čałaviek paśla raśpivańnia śpirtnych napojaŭ stralaŭ ź pnieŭmatyčnaha pistaleta ŭ bok voknaŭ internata navučalnaj ustanovy. U vyniku supraćpraŭnych dziejańniaŭ byli paškodžanyja čatyry škłopakiety na niekalkich pavierchach internata.
Pavodle słoŭ mužčyny, pistalet jon nabyŭ u Rasii, dzie byŭ na zarobkach. Stralaŭ z kvatery žyłoha doma, kudy pryjšoŭ ź siabrami. Internat znachodzicca nasuprać hetaha doma.
Jak rastłumačyŭ hramadzianin, jon nie dumaŭ pra mahčymyja nastupstvy i paličyŭ, što drob nie dalacić da voknaŭ.
Pnieŭmatyčny pistalet u jaho kanfiskavany.
Sankcyja č. 1 art. 339 Kryminalnaha kodeksa praduhledžvaje pakarańnie ŭ vyhladzie hramadskich rabot, albo štrafu, albo papraŭčych rabot na termin da dvuch hadoŭ, albo aryštu na termin da šaści miesiacaŭ, albo pazbaŭleńnia voli na termin da troch hadoŭ.