U Minsku ździŭleny tym, što pieramožcu konkursu pryhažości «Misis śvietu-2014» Marynu Alaksiejčyk nazyvajuć pradstaŭnicaj Biełarusi, bo nie nakiroŭvali nikoha na hety ahlad.
Pra heta RIA «Novosti» paviedamiła Julija Duboŭskaja, pres-sakratar biełaruskaha telekanała ANT, jaki pravodzić u krainie nacyjanalnyja konkursy pryhažości i rychtuje ŭdzielnic dla konkursaŭ mižnarodnaha maštabu.
«Da nas zvyčajna źviartajucca arhanizatary padobnych konkursaŭ z prośbaj pradastavić udzielnika. Hetyja ž arhanizatary (konkursu ŭ amierykanskim štacie Merylend) da nas naohuł nie źviartalisia», — skazała Duboŭskaja. Pavodle jaje słoŭ, arhanizatary biełaruskich nacyjanalnych konkursaŭ ŭpieršyniu čujuć pra Alaksiejčyk.
«My hetuju dziaŭčynu nie viedajem. My navat nie viedali, što taki konkurs budzie prachodzić», - adznačyła pres-sakratar, dadaŭšy, što situacyja dziŭnaja i nie zusim zrazumiełaja.
Duboŭskaja raspaviała, što tradycyjna ŭ mižnarodnych konkursach Biełaruś ŭjaŭlajuć pieramožcy nacyjanalnych spabornictvaŭ, i ŭ sioleta taki konkurs pravodziŭsia — «Misis Biełaruś» stała Julija Pierahudava.
Infarmacyja, što pradstaŭnica Biełarusi Maryna Alaksiejčyk pieramahła na konkursie «Misis śvietu — 2014» źjaviłasia siońnia ranicaj.
U pryvatnaści, BiełTA paviedamiła, što ŭładalnicy hetaha hanarovaha tytuła 31 hod. Jana vyjšła zamuž čatyry hady tamu. Ciapier pracuje televiadučaj i vystupaje na scenie ŭ jakaści śpiavački.
Konkurs praciahvaŭsia 8 dzion, u im brali ŭdzieł pradstaŭnicy z 35 krain. Prahrama konkursu składałasia ź niekalkich numaroŭ. U pačatku ŭdzielnicy vykonvali rytmičny taniec. Za im išoŭ pakaz kupalnikaŭ i viačernich sukienak. Hledačoŭ taksama zabaŭlali śpiecyjalna zaprošanyja artysty i kalektyvy. U finale konkursu žančyny pavinny byli vyjści ŭ nacyjanalnym kaściumie abo ŭ mastackim stroi, jaki padkreślivaŭ by ich nacyjanalnuju prynaležnaść.
