Vydańnie BuzzFeed źviazałasia z čałaviekam, jaki dasłaŭ u Rasijski sajuz inžynieraŭ zdymak «ataki» źniščalnika na «Boinh» va Ukrainie, jaki byŭ pakazany ŭ efiry Pieršaha kanała. Jon raspavioŭ, što znajšoŭ zdymak na internet-forumie i nie ŭpeŭnieny ŭ jaho sapraŭdnaści.
Džordž Biłt, jaki skazaŭ, što źjaŭlajecca vypusknikom MIT i avijaekśpiertam z 26-hadovym stažam, ale nie pryvioŭ inšych padrabiaznaściej svajoj bijahrafii, paviedamiŭ, što ŭbačyŭ dakład RSI, dzie ŭ atacy na «Boinh» abvinavačvaŭsia ŭkrainski źniščalnik. Hetaja vysnova adpaviadała jaho ułasnym zdahadkam, i jon prysłaŭ pieršamu vice-prezidentu sajuza Ivanu Andryjeŭskamu spasyłku na staronku internet-forumu, dzie byŭ apublikavany zdymak. Pry hetym Biłt vyrazna ŭkazaŭ, što pabačyŭ zdymak mienavita tam.
Surazmoŭca vydańnia pryznaŭsia, što zasmučany tym, što kadr byŭ pakazany na rasijskim telebačańni i heta vyklikała taki šyroki rezanans. Biłt skazaŭ, što nie vałodaje dastatkovymi viedami dla taho, kab paćvierdzić abo abvierhnuć sapraŭdnaść zdymka, jaki dastupny ŭ internecie ź siaredziny kastryčnika. Sam pa sabie zdymak — «nie takoje ŭžo i adkryćcio», skazaŭ jon.
Zdymak, na jakim pakazana, jak źniščalnik atakuje nibyta małajzijski avijałajnier «Boinh-777», jaki raźbiŭsia ŭ Danieckaj vobłaści Ukrainy 17 lipienia, byŭ pakazany ŭ prahramie Michaiła Lavonćjeva «Odnako» napiaredadni ŭviečary.
Zdymak redakcyja Pieršaha kanała atrymała ad Rasijskaha sajuza inžynieraŭ, jakomu jaho, u svaju čarhu, 12 listapada dasłaŭ Džordž Biłt. Michaił Lavonćjeŭ raspavioŭ, što žurnalisty telekanała biespaśpiachova sprabavali znajści Biłta, paśla čaho vyrašyli apublikavać kadr biez paćvierdžańnia sapraŭdnaści. Pry hetym tych, chto ŭsumniŭsia ŭ aŭtentyčnaści zdymka, jon nazvaŭ «bydłam».
Sam Pieršy kanał u siužecie ad 15 listapada usumniŭsia ŭ realnaści Džordža Biłta i sapraŭdnaści zdymka.
U pryvatnaści, žurnalisty kanała nie znajšli čałavieka z takimi imiem i proźviščam siarod vypusknikoŭ Masačusietstkaha technałahičnaha instytuta (Massachusetts Institute of Technology, MIT) za apošnija čverć stahodździa.
Nieŭzabavie paśla publikacyi zapisu prahramy na sajcie Pieršaha kanała ŭ sacsietkach pačali źjaŭlacca abskardžańni sapraŭdnaści zdymka.
U pryvatnaści, niekatoryja błohiery vykazali zdahadku, što dla vyrabu nibyta spadarožnikavaha kadra byŭ vykarystany zdymak z kart Google dvuchhadovaj daŭnaści. Pry hetym Illa Varłamaŭ ukazaŭ, što ŭ kałažy było vykarystana fota vajennaha samalota, padobnaha na Su-27, tady jak u repartažy Pieršaha kanała zhadvajecca MiH-29. Akramia taho, pretenzii vyklikali pamiery samalotaŭ adnosna pamieraŭ naziemnych abjektaŭ, a taksama niesupadzieńnie z realnymi miescam i časam incydentu.
Palityk Alaksiej Navalny u svaju čarhu raspavioŭ, što nie zmoh znajści paćvierdžańniaŭ navukovaj dziejnaści staršyni RSI Mikałaja Karakina.
Sama arhanizacyja, pa jaho słovach, «bolš padobnaja na karparacyju, čym na prafsajuz», a značnaja častka jaje kiraŭnikoŭ apynułasia źviazanaja z TAA «inžynirynhavaja kampanija 2K».
17 lipienia ŭ Danieckaj vobłaści adbyłosia krušeńnie samalota «Boinh-777» avijakampanii Malaysia Airlines, jaki lacieŭ z Amsterdama ŭ Kuała-Łumpur. Na borcie łajniera znachodzilisia 298 čałaviek, u tym liku 85 dziaciej i 15 členaŭ ekipaža. Bolšaść ź ich - hramadzianie Niderłandaŭ. Taksama na borcie było 43 paddanych Małajzii i 38 aŭstralijcaŭ. Usie jany zahinuli.
