Padčas dakłada ŭrada, Nacbanka i abłvykankamaŭ Alaksandru Łukašenka ab rabocie ekanomiki siarod vystupoŭcaŭ nie było adzinstva.
«Usie cudoŭna razumiejuć, što pry takich staŭkach koštu kredytnych resursaŭ ekanomika nie raźvivajecca. Ja nie kažu pra abarotku, havorka idzie pra «doŭhija hrošy». Biez padtrymki dziaržavy pajści na kredytavańnie inviestycyjnaha prajektu moža tolki śmiarotnik.
Ekanomika stała zakładnikam bankaŭskaj sistemy. Bankaŭskaja sistema stała svajho rodu MMM, dzie łamavuju nahruzku ciahnuć pradpryjemstvy realnaha siektaru», —
zajaviŭ staršynia Dziaržkantrolu Leanid Anfimaŭ. Jahonaje viedamstva razam z pramysłovymi ministerstvami vystupajuć za naroščvańnie hrašovaj masy i dalejšuju razdaču kredytaŭ pradpryjemstvam.
Anfimaŭ byŭ namieśnikam Jakabsona, a paśla staŭ na jaho miesca.
Nacbank, u svaju čarhu, zaklikaje da bolš žorstkaj manietarnaj palityki.
Jaho staršynia Nadzieja Jermakova ŭskočyła ź miesca, pierabivajučy Anfimava: «My nie zhodnyja…»
Nadzieja Jermakova vyrašyła nie maŭčać.
«Vy nie zhodnyja ź ličbami?» — pierapyniŭ Jermakovu Łukašenka.
«Nie ź ličbami, a ŭvohule z pazicyjami, što Nacyjanalny bank i bankaŭskaja sistema pieratvarylisia ŭ MMM. Ja z hetym nie zhodnaja… Tamu ja chacieła by paprasiła vas stvaryć kamisiju, jakaja b dała acenku pracy Nacbanka», — zajaviła Jermakova, šukajučy padtrymku.
«A navošta? Vy što, nie možacie praanalizavać situacyju ŭ Nacbanku i nie viedaje pałažeńnie spraŭ u bankaŭskaj sistemie?» — nie zrazumieŭ Łukašenka.
«Nie, ja viedaju. Ale ja nie zhodnaja…» — udakładniła Jermakova svaje razychodžańni z pazicyjaj KDK.
«Viedajecie. Tady čamu vy nie sieli ŭdvaich i adzin adnamu nie pakłali na stoł materyjały i nie supastavili?» — znoŭ pierabiŭ jaje Łukašenka.
Leanid Anfimaŭ padčas pikiroŭki hartaŭ papiery, nie sprabujučy ŭstupić u sprečku.
A Łukašenka praciahvaŭ u bok Jermakovaj: «Kab nie było bolš razmoŭ nakont taho, što vy tam žyrujecie razam z bankami, davajcie damovimsia tak. Ja, naprykład, formułu havaru. Vaša zarpłata pavinna być niedzie blizkaja da zarpłaty premjer-ministra. Usie astatnija pavinny być vybudavany jak va ŭradzie. Chto nie choča pracavać — zvalniajciesia adrazu. Toje ž samaje pa raschodach usich bankaŭ, pačynajučy ad vas i zakančvajučy inšymi.
Abydzieciesia dvuma aŭtamabilami ŭ Nacbanku dla absłuhoŭvańnia — značyć, dva lehkavyja aŭtamabili. Siońnia heta niatanna, tym bolš takija ceny na bienzin.
Zabieśpiačeńnie, zarpłata, prahramnaje zabieśpiačeńnie, bieź jakoha nie abyścisia — asabista zaćvierdzicie kožnamu. Usio astatniaje źniać. I asabista mnie dałažycie svaju pazicyju, nie ŭzhadniajučy ni ź jakimi bankami».
* * *
U efiry ANT pakazali inšuju dyskusiju na tuju ž temu – pamiž premjer-ministram Michaiłam Miaśnikovičam i daradcam prezidenta Kiryłam Rudym.
Miaśnikovič ad imia ŭrada patrabavaŭ kredyty na madernizacyju.
Michaiła Miaśnikoviča Łukašenka ŭščuvaŭ na praciahu ŭsioj narady.
«Kab kredyty byli dastupnymi, staŭka pavinna być nie vyšejšaj za rentabielnaść. To bok, naprykład, dla pramysłovaści staŭka pavinna być nie bolšaj za 10%. Značycca, inflacyja pavinna być nie bolšaj za 9%, — pačaŭ jamu tłumačyć Rudy. — Heta nie libieralnaja prapanova, libieralnaj źjaŭlajecca svabodnaja emisija. Tut chutčej prapanujecca ŭviadzieńnie hrašovaj dyktatury».
Kirył Rudy, jak i Nacbank, prapanuje zmahacca ź inflacyjaj.
«U hetaj suviazi kamisii prapanujecca zrabić pryjarytetam na dva hady źnižeńnie inflacyi da siaredniehadovaha značeńnia 9%. I dalej imknucca źnižać jašče nižej. Heta całkam realna, — źviarnuŭsia jon da Łukašenki. — Treba kiravać hrašovaj masaj, i, mahčyma, pierahledzieć u bok skaračeńnia šerah dziaržprahram».
«Nu i što tut, Michaił Uładzimiravič, antydziaržaŭnaha?» — padšpiliŭ Łukašenka Miaśnikoviča.
«Treba razumieć, što inviestycyjnaja aktyŭnaść budzie źnižanaja, VUP budzie mienšym za 100%, i zarobak budzie nižejšym», — staŭ šantažavać — pieradvybarčy hod! — Miaśnikovič, ale ŭ Rudaha było jašče šmat arhumientaŭ.
«Źnižeńnie pracentnych stavak, naadvarot, stymuluje inviestycyjnuju aktyŭnaść, a nie źnižaje, — hnuŭ svaju liniju jon. – A źnižeńnie inflacyi pavyšaje realnyja dachody, kali naminalnyja…»
«U hetaj situacyi nielha vyryvać pytańni z ahulnaha kantekstu, — nie vytrymaŭ Miaśnikovič i pierabiŭ daradcu prezidenta. – Pieradusim my pavinny hladzieć, kab było spakojna na valutnym rynku».
Łukašenka paprasiŭ prakamientavać situacyju kiraŭnika Administracyi prezidenta Andrej Kabiakoŭ. Toj pasprabavaŭ adkazać «i vašym, i našym»: «Kirył Valancinavič maje racyju ŭ pierśpiektyvie, što treba vychodzić na adnaznačnuju ličbu pa inflacyi, a nie na dvuznačnuju. Ale za adzin hod hetaha nie zrobiš, tamu tut maje racyju Miaśnikovič».
