Jaki dzień Volha Hrunova, maci asudžanaha da śmiarotnaha pakarańnia Alaksandra Hrunova, nie znachodzić sabie miesca. Napiaredadni žančyna atrymała na pošcie kardonnyja skrynki z adzieńniem syna, u jakim jon znachodziŭsia ŭ kamiery śmiarotnikaŭ u minskaj turmie pa vulicy Vaładarskaha.
13 kastryčnika Volha Hrunova była na spatkańni ŭ turmie, a 29 kastryčnika niechta Piatrovič V.U. dasłaŭ joj u Homiel ź minskaha paštovaha adździaleńnia №115 try kardonnyja skrynki. Adras adpraŭnika nie abaznačany, napisana tolki: «Da zapatrabavańnia».
U skrynkach akramia zvyčajnaha adzieńnia lažała i turemnaja roba z namalavanym biełym vakoł, pasiaredzinie jakoha — litary «IMN». Usio heta i pakazvaje z płačam Volha Hrunova, jakuju raz-poraz pierabivaje nie zusim ćviarozaja siabroŭka Valancina.
Valancina: «Niapravilna! Tvoj list da jaho nie dajšoŭ. Sakrataru dajšoŭ, dyk sakratara treba karać, a nie Łukašenku». Hrunova: «Jon pamiłavańnia nie zrabiŭ. Nie zrabiŭ. Usio. Ad jaho ŭsio zaležała». Maci vyciahvaje z kučy adzieńnia turemnuju robu syna i ciapier užo žorstka łaje tych, chto dasłaŭ joj vopratku: «Jany, žyvioły, sunuli toje, u čym jon znachodziŭsia tam, i mnie kinuli. Jano mnie naohuł nie treba. Ja jamu nie dasyłała takoha. Jon chadziŭ u mianie ŭ lepšym. Heta nie jaho, heta ich. Žyvioły, kab ich prancy zžerli… Voś, možacie sfatahrafavać».
Na dumku pravaabaroncaŭ, sam fakt, što maci atrymała asabistyja rečy syna, chutčej za ŭsio aznačaje, što Alaksandra Hrunova ŭžo rasstralali — u pieryjad pamiž 13 i 29 kastryčnika. Takaja praktyka skłałasia ŭ sistemie vykanańnia pakarańniaŭ Biełarusi: rečy asudžanaha da rasstrełu adsyłajuć rodnym paśla taho, jak prysud vykanany.
Aficyjnaha paviedamleńnia pra śmiarotnaje pakarańnie syna Volha Hrunova pakul nie atrymała. Nie vydajuć u Biełarusi rodnym i blizkim i cieła rasstralanaha, a miesca jaho pachavańnia trymajecca ŭ sakrecie.
Pakul Alaksandr Hrunoŭ znachodziŭsia ŭ turmie, homielski pravaabaronca Leanid Sudalenka, jaki, jak i mnohija inšyja aktyvisty, vystupaje za maratoryj na śmiarotnaje pakarańnie, nakiravaŭ pa davieranaści Hrunova ŭ Kamitet AAN pa pravach čałavieka jaho indyvidualnuju skarhu — na šmatlikija parušeńni padčas praviadzieńnia śledstva pa spravie zabojstva studentki Natalli Jemialjančykavaj.
«Kamitet AAN zarehistravaŭ hetuju skarhu i ŭ toj ža dzień nakiravaŭ uradu Biełarusi prośbu nie vykonvać śmiarotny prysud da taho času, pakul skarha nie budzie razhledžanaja. Na žal, my bačym, što ŭrad znoŭ praihnaravaŭ svaje mižnarodnyja abaviazacielstvy», — adznačyŭ Leanid Sudalenka.
Nahadajem, Homielski abłasny sud dvojčy vynosiŭ prysud ab vyšejšaj miery pakarańnia ŭ dačynieńni da Alaksandra Hrunova za asabliva žorstkaje zabojstva studentki Natalli Jemialjančykavaj. Svajoj achviary zabojca nanios bolš za sotniu nažavych ranieńniaŭ. Pieršy prysud Hrunovu byŭ admienieny Viarchoŭnym sudom z pryčyny pracedurnych parušeńniaŭ.
