Jak minimum šeść sudździaŭ zvolnilisia, a mnohija inšyja prosta admovilisia rehistravać tak zvanyja adnapołyja «šluby» u štacie Paŭnočnaja Karalina, paviedamlajuć amierykanskija ŚMI.
U pačatku kastryčnika 2014 hoda fiederalny sud pryznaŭ antykanstytucyjnym toje, što ŭ Paŭnočnaj Karalinie tolki šluby pamiž mužčynaj i žančynaj ličacca sapraŭdnymi. Takim čynam sudździ miascovych hramadzianskich sudoŭ musili pačać vykonvać pastanovu vyšejšaj instancyi — abviaščać sužencami ludziej adnaho połu.
Adnak vykonvać pastanovu admaŭlajucca sudździ miascovychsudoŭ.
Mienš čym za 20 dzion zvolnilisia šeść sudździaŭ, jakija zajavili, što ich chryścijanskija pierakanańni nie dazvalajuć im abviaščać šlubam toje, što im nie źjaŭlajecca.
«Ja musiŭ zrabić heta, bo heta było pytańniem sumleńnia. Zaklučać takija sajuzy budzie parušeńniem zapavietaŭ Hospada, tamu ja nie mahu hetaha rabić», — skazaŭ, naprykład, sudździa Bił Ściviensan.
Sudździa Hiejł Miryk zaznačyła, što jana vykonvała svaje abaviazki biesstarońnie. Ale ŭ dadzienym vypadku parušajecca svaboda vieravyznańnia, bo ad jaje patrabujuć iści suprać svaich pierakanańniaŭ.
«Kab pracavać dalej, ja musiła b zdradzić tamu, u što ja vieru», — skazała sudździa.
Inšyja sudździ nie syšli ŭ adstaŭku, ale zajavili, što prosta admaŭlajucca rehistravać adnapołyja «šluby». Heta moža pryvieści da ich zvalnieńnia.
Siabry Respublikanskaj partyi ŭ sienacie Paŭnočnaj Karaliny prapanujuć dazvolić dziaržaŭnym słužačym nie ŭdzielničać u rehistracyi takich «šlubaŭ», kali heta supiarečyć ich relihijnym pierakanańniam.
«Prymušać sudździu vybirać pamiž svaim pravam na relihijnuju svabodu i pracoŭnym miescam — heta prosta niedapuščalna», — zajaviŭ respublikaniec Fił Bierhier.
Katalickaja Carkva, usie kananičnyja Pravasłaŭnyja Cerkvy i mnohija pratestanckija denaminacyi vyznajuć šlubam tolki sajuz mužčyny i žančyny.
