U Małdovie aštrafavali ŭsie televizijnyja kanały, jakija tranślavali rasijskija naviny i «parušyli pryncyp pluralizmu mierkavańniaŭ».
Adpaviednaje rašeńnie pryniaŭ Kaardynacyjny saviet teleradyjoviaščańnia Małdovy ŭ aŭtorak.
U pryvatnaści, pad štrafy patrapili kanały «Prajm TB», jaki retranśluje «Pieršy kanał», TV7 — retranśluje NTV, «RTR Małdova» i «Ren Małdova».
Rada razhledzieła infarmacyjnyja prahramy «Čas», «Siońnia», «Vieści» i «Naviny 24» pavodle «pryncypaŭ sacyjalnaha i palityčnaha bałansu, spraviadlivaści i abjektyŭnaści».
Ekśpierty pryjšli da vysnovy, što navinavyja błoki rasijskich kanałaŭ «z vykarystańniem jarłykoŭ dyskredytujuć, ačarniajuć i pradstaŭlajuć u niehatyŭnym śviatle adzin z bakoŭ kanfliktu (urad Ukrainy), bolšaść historyj majuć mocnuju antyŭkrainskuju afarboŭku i adlustroŭvajuć pohlady vyklučna sieparatystaŭ».
Rasijskija naviny, pavodle vysnovaŭ małdaŭskich analitykaŭ, «dezinfarmujuć i manipulujuć słovami i vyjavami, raspaviadajučy hramadskaści ab padziejach u paŭdniova-ŭschodniaj Ukrainie, vykarystoŭvajuć mantaž i kamientary, karystajučysia paklopam i abrazami uzbrojenych sił Ukrainy, raspaŭsiudžvajučy nianaviść da jeŭrapiejskich i jeŭraatłantyčnych kaštoŭnaściaŭ, spryjajuć raspaŭsiudžvańniu niepaćvierdžanych čutak».
Kanały, jakija retranślavali rasijskija naviny, abaviazali «prypynić rekłamu na praciahu 72 hadzin».
