Žurnalist «Biełaruskaha Radyjo Racyja» pra abvinavačańnie suprać siabie daviedaŭsia tolki postfaktum.
Niekalki miesiacaŭ tamu žurnalist vydańnia Vital Siamaška zrabiŭ šerah infarmacyjnych materyjałaŭ pra hramadskija žyćcio na Lidčynie. A litaralna dniami atrymaŭ paviedamleńnie z upraŭleńnia ŭnutranych spraŭ Lidskaha rajvykankama.
Pavodle milicyjantaŭ, suprać Vitala Siamaški była zaviedzienaja administracyjnaja sprava pa artykule 22.9 za parušeńnie zakanadaŭstva ab ŚMI (pracu biez akredytacyi na zamiežnaje vydańnie).
Cikava, što svaim paviedamleńniem milicyjanty prainfarmavali žurnalista, što sprava suprać Siamaški ŭžo spynienaja ŭ suviazi sa skančeńniem terminu pryciahnieńnia da adkaznaści – z času padziejaŭ prajšło ŭžo bolš za dva miesiacy.
Sam ža žurnalist upeŭnieny, što za administracyjnaj spravaj staić upraŭleńnie KDB pa Hrodzienskaj vobłaści, jakoje, na dumku Vitala Siamaški, apošnim časam vielmi pilna manitoryć sajt «Biełaruskaha Radyjo Racyja» i sprabuje pryciahnuć da adkaznaści žurnalistaŭ.
– Sioleta ŭ mai padobnaja sprava była zaviedziena na jašče adnaho hrodzienskaha žurnalista Andreja Mialešku. Tady milicyjanty apytali ludziej, što fihuravali ŭ materyjale karespandenta, pa vynikach čaho i byŭ składzieny pratakoł.
U maim vypadku situacyja paŭtaryłasia na 100% - adrazu paśla publikacyi da hierojaŭ materyjałaŭ pryjšoŭ supracoŭnik KDB, jaki zapatrabavaŭ nazvać aŭtara materyjału i akaličnaści majoj pracy, – raspavioŭ pres-słužbie HA «Biełaruskaja asacyjacyja žurnalistaŭ» Vital Siamaška.
Nahadajem, što składańnie administracyjnych pratakołaŭ suprać žurnalistaŭ, jakija nibyta pracujuć biez akredytacyi na zamiežnyja ŚMI, nabyvaje charaktar sapraŭdnaj kampanii.
Tak ciaham leta i pačatku vosieni ŭžo suprać siami biełaruskich žurnalistaŭ milicyjaj byli raspačatyja administracyjnyja spravy za nibyta parušeńnie paradku vyrabu pradukcyi ŚMI – pracu biez akredytacyi.
U toj ža čas usie mižnarodnyja žurnalisckija arhanizacyi zaklikajuć ułady Biełarusi skasavać anachraničny paradak akredytacyi, jaki parušaje prava na dostup da infarmacyi. Pradstaŭnica ABSIE pa svabodzie ŚMI Dunia Mijatavič padčas svajho aficyjnaha vizitu ŭ Minsk 15-16 vieraśnia 2014 h. taksama akcentavała ŭvahu na nieabchodnaści admianić abaviazkovuju akredytacyju žurnalistaŭ.
