Na sudovaje pasiedžańnie Juryj Rubcoŭ pryjšoŭ z rečami.
Siońnia ŭ sudździe Centralnaha rajona Minska pačaŭsia razhlad sudovaj spravy suprać aktyvista Juryja Rubcova, jakoha abvinavačvajuć u abrazie sudździ.
Pavodle viersii abvinavačvańnia, Rubcoŭ abraziŭ sudździu Kiryła Paleucha i nazvaŭ jaho «padonkam», kali jaho sudzili paśla zatrymańnia na akcyi «Čarnobylski šlach–2014». Padčas akcyi jon chadziŭ u majcy z nadpisam «Łukašenka, sychodź».
Rubcovu inkryminujuć artykuł 391 Kryminalnaha kodeksu «Abraza sudździ ci narodnaha zasiadaciela».
Siońnia Rubcoŭ pryjšoŭ na sud u majcy «Łukašenka, sychodź». Praces viała sudździa Natalla Vajciachovič.
Sud pačaŭsia z chadajnictva Rubcova ab advodzie ŭsiaho składa suda. «Ja nie mahu daviarać sudu, bo nie vykonvajecca patrabavańnie artykuła 60 Kanstytucyi ab niezaležnaści sudovaj ułady. Pakul sudździ pracujuć pa kantrakcie, nielha kazać pra niezaležnaść sudździaŭ», — patłumačyŭ Rubcoŭ.
Sudździa adchiliła chadajnictva. Taksama było adchilena chadajnictva abarony ab źmienie paradku dopytu i zabaronieny fota- i videazapis. Za čas pasiedžańnia sud paśpieŭ apytać Rubcova, Paleucha i čatyroch śviedak: dvuch AMAPaŭcaŭ, jakija byli śviedkami na administratyŭnym pracesie suprać Rubcova, sakratarku suda i kanvojnaha milicyjanta.
Śviedki abvinavačvańnia kažuć, što Rubcoŭ pavodziŭ siabie nieadekvatna, kłaŭsia na łaŭku, razmachvaŭ rukami, a ŭ niejki momant pajšoŭ da sudździ i skazaŭ tamu, što «heta nie sud, a sudzilišča, a sudździa padonak». Taksama śviedki ŭzhadvajuć, što Rubcoŭ kazaŭ, što «vyjdzie i znojdzie sudździu».
Sam Rubcoŭ pryznaje, što kazaŭ frazu «nie sud, a sudzilišča», adnak zatym jon skazaŭ, što «sudździ, jakija vynosiać niezakonnyja rašeńni, — padonki», čym apielavaŭ nie kankretna da asoby sudździ, a da sudovaj sistemy Biełarusi. Svoj ruch u bok sudździ jon patłumačyŭ tym, što Paleuch prapanavaŭ jamu aznajomicca z materyjałami spravy i praciahnuŭ papiery.
Rubcoŭ taksama pastajanna źviartaŭ uvahu suda na toje, što jon stajaŭ pierad sudom z aholenym torsam, bo ź jaho źniali majku. Taksama ŭ jaho zabrali akulary, choć jon drenna bačyć. Rubcoŭ vykazvaŭ zaŭvahu i pracy sakratara. Jon śćviardžaŭ, što pratakoł pasiedžańnia viali ad ruki, a potym praź niekalki dzion dali ŭžo ŭ nadrukavanym vyhladzie, i jon dumaje, što pratakoł byŭ źmienieny. Juryj Rubcoŭ taksama śćviardžaŭ, što pakazańni paciarpiełaha i śviedak amal identyčnyja, choć jany śćviardžajuć, što davali pakazańni śledčym u vyhladzie volnaha apaviadańnia.
U vyniku sudździa vyrašyła ŭziać pierapynak da 6 kastryčnika, praź niajaŭku adnaho śviedki abvinavačvańnia. Abarona taksama padała chadajnictva ab vykliku śviedak i ekśpierta.
