Pradstaŭnik Arhanizacyi pa biaśpiecy i supracoŭnictvie ŭ Jeŭropie (ABSIE) pa pytańniach svabody ŚMI Dunia Mijatavič vystupaje suprać uzmacnieńnia žorstkaści zakanadaŭstva ab internecie, razmova ab čym idzie ŭ niekatorych krainach — udzielnicach ABSIE.
Ab hetym jana zajaviła 16 vieraśnia na pasiadžeńni kruhłaha stała z udziełam žurnalistaŭ, pravaabaroncaŭ i pradstaŭnikoŭ niedziaržaŭnych arhanizacyj. Arhanizataram mierapryjemstva vystupiŭ Centr pravavoj transfarmacyi (Lawtrend).
«My možam doŭha dyskutavać na temu ksienafobii, movy nianaviści, žorstkaha abychodžańnia ź dziećmi, teraryzmu i ekstremizmu ŭ internecie, — skazała jana. — Adnak usie hetyja rečy jość i ŭ realnym žyćci, prosta ciapier jany pieraniesieny ŭ kibierprastoru, i prablema stała bolš vidavočnaja. Ja zusim nie zhodnaja z tymi ŭładami, jakija kažuć, što nieabchodna rabić bolš žorstkim zakanadaŭstva ab internecie, kab abaranić hramadstva. Jany kažuć, što heta robicca dla baraćby z ekstremizmam, dla abarony dziaciej, ale kali pahladzieć bolš pilna, možna zrazumieć, što heta robicca dla abmiežavańnia svabody słova ŭ hramadstvie».
Pavodle słoŭ Mijatavič, ciapier isnujuć nacyjanalnyja i mižnarodnyja instrumienty dla taho, kab zmahacca z padobnymi pahrozami, i najpierš takoj źjaŭlajecca niezaležnaja sudovaja sistema. «Ja suprać taho, kab niejkija kvaziviedamstvy ci ŭradavyja orhany, nie kažučy ŭžo pra ministerstvy, zajmalisia hetymi prablemami, kab jany mieli prava zakryvać jakija-niebudź staronki ci vykreślivać kantent, jaki im nie padabajecca», — adznačyła jana.
Uzmacnieńnie žorstkaści zakanadaŭstva ab internecie, skazała pradstaŭnik ABSIE pa pytańniach svabody ŚMI, padajecca pad markaj abarony nacyjanalnaj biaśpieki, ale ŭ bolšaści vypadkaŭ takim čynam ułady sprabujuć utaić krytyku ŭ svoj adras. «Ale ŭ demakratyčnaj sistemie krytyka — heta taja cana, jakuju treba płacić», — padkreśliła Mijatavič.
U praciah hetaj temy biełaruski pravaabaronca Valancin Stefanovič raskazaŭ pradstaŭniku ABSIE ab prablemie prymianieńnia ŭ Biełarusi antyekstremisckaha zakanadaŭstva. U pryvatnaści, jon źviarnuŭ uvahu na fakty błakiravańnia ŭ nacyjanalnym siehmiencie internetu sajta spring96.org, što naležyć likvidavanamu ŭładami pravaabarončamu centru «Viasna». Stefanovič taksama nahadaŭ, što ekstremisckimi byli pryznanyja albom «Pres-fota Biełarusi — 2011» i kniha «Aśviečanyja Biełaruščynaj» Alesia Bialackaha.
U svaju čarhu dyrektar biuro pradstaŭnika ABSIE pa pytańniach svabody ŚMI Andrej Rychtar paviedamiŭ, što na praciahu bližejšych dzion budzie vypuščana kamiunikie ab tym, jak zakanadaŭstva ab ekstremiźmie pieraškadžaje svabodzie srodkaŭ masavaj infarmacyi.
