Ukrainski parłamient na zakrytym pasiadžeńni padtrymaŭ prezidenckija zakony pra asablivy status Łuhanskaj i Danieckaj abłaściej i pra amnistyju dla ŭdzielnikaŭ padziej na Danbasie.
Daterminovyja miascovyja vybary na terytoryjach, jakija padkantrolnyja samaabvieščanym «DNR» i «ŁNR», pavinny adbycca 7 śniežnia (vybary va Ukrainie projduć 26 kastryčnika).
Terytoryi z asablivym statusam na terytoryi Łuhanskaj i Danieckaj abłaściej, pavodle zakona, pavinna vyznačać svaim rašeńniem Viarchoŭnaja Rada Ukrainy.
Taksama parłamient zaćviardžaje finansavańnie, jakoje budzie nakiroŭvacca na adnaŭleńnie i ŭtrymańnie asablivych terytoryj.
Narodnaja milicyja, jakaja budzie stvaracca merami abranych na vybarach haradoŭ, składacca vyklučna z hramadzian Ukrainy, jakija zarehistravanyja ŭ adpaviednych nasielenych punktach.
Termin dziejańnia asablivaha statusu hetych terytoryj składaje try hady.
Pryniaty taksama zakon «Ab niedapuščeńni pieraśledu i pakarańnia udzielnikaŭ padziej na terytoryi Danieckaj i Łuhanskaj abłaściej».
Amnistyja dla aktyvistaŭ samaabvieščanych «DNR» i «ŁNR» nie budzie raspaŭsiudžvacca na asob, jakija ŭčynili ciažkija złačynstvy ci datyčnyja da padzieńnia małajzijskaha samalota rejsa MH17.
Taksama amnistyja nie zakranie ludziej, jakija majuć dačynieńnie i abvinavačvajucca ŭ zabojstvach, zamachu na žyćcio dziaržaŭnaha dziejača, dyviersijach, zachopie zakładnikaŭ, handli ludźmi, zhvałtavańni i finansavańni teraryzmu.
Paśla pryniaćcia zakonaŭ u zakrytym režymie Viarchoŭnaja Rada pierajšła da adkrytaha razhladu pytańnia ab ratyfikacyi Pahadnieńnia ab asacyjacyi ź Jeŭrasajuzam.
