Patryjarch Maskoŭski Kirył raspavioŭ rasiejcam pra asablivaści «ruskaj cyvilizacyi, jakaja «naležyć da cyvilizacyi bolš šyrokaj, čym Rasijskaja Fiederacyja» i pra važnaść zachavańnia «Ruskaha śvietu». A jašče pra toje, jakoj padstupnaj źjaŭlajecca zachodniaja cyvilizacyja.
Pramovu Patryjarcha, jakaja prahučała ŭ čarhovym vypusku aŭtarskaj prahramy «Słova pastyra» 6 vieraśnia, apublikavała Pres-słužba Patryjarcha Maskoŭskaha.
Voś jak Patryjarch Kirył acharaktaryzavaŭ rasijskuju cyvilizacyju:
«Rasija naležyć da cyvilizacyi bolš šyrokaj, čym Rasijskaja Fiederacyja. Hetuju cyvilizacyju my nazyvajem Ruskim śvietam.
Adno heta paniaćcie — Ruski śviet — vyvodzić ź siabie našych praciŭnikaŭ, u tym liku i tyja nacyjanalistyčna nastrojenyja siły na Ukrainie, jakija sprabujuć u Rasii bačyć voraha, a ŭ Ruskim śviecie — strašnuju palityčnuju daktrynu, nakiravanuju na abmiežavańnie suvierenitetu Ukrainy, na zaniavoleńnie Ukrainy Rasijaj. I ŭžo jak dastajecca ŭsim, chto maje advahu ŭžyć adno tolki słovazłučeńnie Ruski śviet!»
Dla tłumačeńnia Patryjarch Maskoŭski źviartajecca da dobra viadomaha prykłada z «Apovieści minułych hadoŭ», pieršaha letapisu Kijeŭskaj Rusi, nazyvajučy jaje «najvažniejšaj krynicaj nacyjanalnaj historyi», adnak u letapisie havorka idzie ab ziemlach Rusi Kijeŭskaj, a nie Rasii.
«Heta naš histaryčny chranohraf, jak kažuć, najvažniejšaja krynica nacyjanalnaj historyi. Letapis byŭ napisany nie ŭ Maskvie, jak vy razumiejecie, jakoj tady nie isnavała, nie ŭ Sankt-Pieciarburhu, jaki tym bolš nie isnavaŭ tady, a byŭ napisany ŭ horadzie Kijevie, u Kijeva-Piačerskaj łaŭry. I pačynałasia jana słovami: «Adkul jość pajšła ruskaja ziamla…».
I nichto ŭ Kijevie nie nazyvaŭ siabie ŭkraincam, a ŭsio nazyvali siabie ruskimi, rusičam. Tak nazyvali nas i staražytnych našych prodkaŭ i vizantyjcy — rusy.
Kali rosy — tak hučała pa-hrecku — nastupali na Kanstancinopal u jakaści vorahaŭ, bo byli ŭ toj čas jazyčnikami, to pramaŭlali hetyja słovy sa stracham, malilisia Hospadu, kab rosy nie ŭvajšli ŭ Kanstancinopal. Nie było inšaha najmieńnia ŭ ludziej, jakija žyli ŭ Kijevie i pa ŭsich prastorach tahačasnaj Rusi. Voś adtul Ruski śviet, ad letapisu našaha, ad prapadobnaha Niestara letapisca», — źviarnuŭsia da rasiejcaŭ z ekranaŭ televizaraŭ Kirył. Ale nie kankretyzavaŭ, što «ruskija» i «rusičy» — heta nie adno i toje ž.
Patryjarch Maskoŭski nazvaŭ relihijnaje vymiareńnie «Ruskaha śvietu» — krynicaj miralubnaści, a zachodniuju cyvilizacyju — «płavilnym katłom», jaki «choča ŭsio pierapłavić».
«Niaprosta siońnia zachoŭvać hetyja kaštoŭnaści. Ale treba razumieć, što biez hetych kaštoŭnaściaŭ nie budzie isnavać ni ruski, ni ŭkrainski, ni biełaruski narod, a ŭsio budzie pierapłaŭleny ŭ niejkim katle cyvilizacyj.
Jość takaja kancepcyja — płavilny kacioł — usio pierapłavić, kab dasiahnuć miru. Ale nie atrymlivajecca. I prykład sučasnaj zachodniaj cyvilizacyi, jakaja ŭstała na šlach hetaha płavilnaha katła, pierakonvaje nas, što ničoha ŭ hetym katle nia pierataplajecca, a zachoŭvajucca i supiarečnaści, i prablemy. I ludzi, niazhodnyja być pierapłaŭlenym ź inšymi, jakija imknucca zachavać svaju samabytnaść, zmahajucca suprać hetaj strašnaj pierśpiektyvy rastvarycca ŭ adnoj ahulnaj prastory», — kaža Kirył, śćviardžajučy, što «zachavańnie cyvilizacyj, u tym liku Ruskaha śvietu, — heta naša ahulnaja zadača.
Nie dla taho, kab adnaŭlać niejkija palityčnyja kanstrukcyi, budavać novyja impieryi, stvarać vajennyja błoki, zusim nie dziela taho. A dla taho, kab zachoŭvać najvialikšuju spadčynu, jakuju my atrymali ad našych prodkaŭ».
Tamu Patryjarch Maskoŭski kaža ab ahulnaj kultury «Ruskaha śvietu», da jakoha jon adnosić i ŭkraincaŭ, i biełarusaŭ.
