Pradstaŭnik ABSIE pa pytańniach svabody ŚMI Dunia Mijatavič 15—16 vieraśnia naviedaje Minsk z aficyjnym vizitam, paviedamiŭ staršy savietnik Mijatavič Hunar Vranh.
Pavodle jaho słoŭ, padčas vizitu Mijatavič sustreniecca z pradstaŭnikami biełaruskaha ŭrada, hramadzianskaj supolnaści i maśmiedyja, kab abmierkavać pytańni svabody ŚMI ŭ Biełarusi.
Akramia taho, ofis pradstaŭnika ABSIE pa pytańniach svabody ŚMI ŭ miežach vizitu Mijatavič arhanizuje adnadzionny sieminar «Uzajemadziejańnie pamiž siłami pravaparadku i miedyja ŭ Biełarusi». U im voźmuć udzieł pradstaŭniki ŭsich žurnalisckich arhanizacyj Biełarusi. Mierapryjemstva arhanizavanaje sumiesna ź Ministerstvam zamiežnych spraŭ Biełarusi.
Varta adznačyć, što Mijatavič nieadnarazova vystupała z krytykaj biełaruskich uładaŭ adnosna ŭmoŭ pracy žurnalistaŭ u krainie. Apošniaja jaje zajava ŭ červieni hetaha hoda tyčyłasia pavieličeńnia kolkaści štrafaŭ, što nakładajucca na biełaruskich žurnalistaŭ u apošnija miesiacy za pracu biez akredytacyi.
«Ja zaniepakojenaja, tamu što takaja praktyka moža efiektyŭna zabaraniać žurnalistam ažyćciaŭlać svaju pracu, — skazała Mijatavič. — Akredytacyja nie pavinna być licenzijaj na dziejnaść, a jaje adsutnaść nie pavinna abmiažoŭvać žurnalistaŭ u zdolnaści pracavać i svabodna vykazvać svajo mierkavańnie. Usie žurnalisty pavinny mieć tyja ž prafiesijnyja pravy, što i pracaŭniki zarehistravanych ŚMI, u tym liku pravy na pošuk i raspaŭsiudžvańnie infarmacyi».
Mijatavič taksama adznačyła, što 5 červienia napisała ministru zamiežnych spraŭ Biełarusi Uładzimiru Makieju pra nieabchodnaść refarmavańnia patrabavańniaŭ da akredytacyi pradstaŭnikoŭ srodkaŭ masavaj infarmacyi.
