Nacyjanalny akademičny kancertny arkiestr Biełarusi vystupić na śviacie kamiernaj muzyki «Viartańnie Paŭnočnych Afinaŭ», pryśviečanym kampazitaru Michaiłu Kleafasu Ahinskamu. Mierapryjemstva projdzie 25 vieraśnia ŭ miastečku Zaleśsie (Smarhonski rajon, Hrodzienskaja vobłaść).
Ab hetym na pres-kanfierencyi 8 vieraśnia ŭ Minsku paviedamiŭ dyrektar — mastacki kiraŭnik arkiestra Michaił Finbierh.
Pavodle jaho słoŭ, na siońnia arkiestr staŭ inicyjataram bolš čym 190 roznych fiestyvalaŭ u małych haradach i miastečkach Biełarusi. Na hety raz fiestyvalnaje dziejańnie projdzie ŭ Zaleśsi — tam, dzie dypłamat, hramadski, palityčny dziejač i kampazitar XIX stahodździa Michaił Kleafas Ahinski pabudavaŭ svaju siadzibu.
Dla śviata «Viartańnie Paŭnočnych Afinaŭ» była raspracavana śpiecyjalnaja muzyčnaja prahrama, praktyčna całkam składzienaja z małaviadomych u Biełarusi tvoraŭ kampazitara. Navukovym kiraŭnikom pry raspracoŭcy prahramy stała Volha Dadzijomava, doktar mastactvaznaŭstva, prafiesar Biełaruskaj dziaržaŭnaj akademii muzyki.
Dadzijomava ŭ svaju čarhu zajaviła, što dziejnaść kancertnaha arkiestra ŭ halinie «viartańnia muzyčnaj spadčyny», jaho ŭvaha da kłasičnych kampazitaraŭ, na imiony jakich Biełaruś maje prava pretendavać naroŭni ź inšymi jeŭrapiejskimi krainami, šmat u čym aktyvizavali pracu vučonych i daśledčykaŭ. U vyniku ich dziejnaści stała viadoma, naprykład, našmat bolš tvoraŭ Ahinskaha, u tym liku pieśni i ramansy, uvierciury da baletaŭ i navat opierny tvor.
Kancepcyja śviata «Viartańnie Paŭnočnych Afinaŭ» i šerah arhanizacyjnych momantaŭ jašče abmiarkoŭvajucca, adznačyŭ namieśnik staršyni Zaleskaha rajvykankama Hienadź Byčko. Tak, pavodle jaho słoŭ, razhladajecca varyjant pravieści hetaje muzyčnaje śviata va ŭnutranym dvoryku siadziby Ahinskich, ustanaviŭšy tam scenu i kresły. «Čałaviek trysta heta terytoryja zmoža ŭmiaścić, a kamu miesca nie chopić, toj zmoža pasłuchać stojačy na miažy parkavaj zony pry siadzibie», — skazaŭ čynoŭnik.
Hety varyjant kancepcyi praduhledžvaje nievialikaje teatralizavanaje dziejańnie, jakoje zmohuć pakazać akciory Maładziečanskaha teatra, a taksama vystavu z kalekcyj Dziaržaŭnaha muzieja historyi teatralnaj i muzyčnaj kultury ŭ Minsku. Hetyja mierapryjemstvy prapanoŭvajecca pravieści niepasredna ŭ siadzibie Ahinskich.
«Adnak pakul heta tolki adzin z varyjantaŭ kancepcyi», — paŭtaryŭ Byčko.
