Kamandzir ukrainskaha bataljona śpiecyjalnaha pryznačeńnia «Azoŭ» Andrej Bilecki paviedamiŭ pra źniščeńnie bajcami «DNR» umacavanaha rajona bataljona i pahransłužby pobač z Maryupalem.
Ab hetym paviedamlajecca na staroncy bataljona ŭ fejsbuku.
Pavodle Bileckaha, udar pa ŭmacavanym rajonie nanieśli z boku Novaazoŭska.
Taksama Bilecki raspavioŭ pra straty siarod bajcoŭ bataljona i abvinavaciŭ kamandavańnie ŭ nieakazańni ahniavoj padtrymki.
«Dziakuj hienierałam, jakija dźvie hadziny abiacali artyleryjski ahoń dakładnaj navodkaj, ale ničoha nie zrabili. Źniščana ŭsia naša mizernaja technika. Jość «dvuchsotyja» (zahinułyja). Pracavali ščylnym ahniom dziakujučy navodčykam-zdradnikam», — zajaviŭ kamandzir bataljona «Azoŭ».
Akramia taho, śpiecyjalny karespandent «Kommiersanta» Illa Barabanaŭ, jaki znachodzicca na miescy padziej, paviedamiŭ u svaim fejsbuku ab abstrełach błokpastoŭ ukrainskich vajskoŭcaŭ la Maryupala.
Paźniej jon napisaŭ u svaim tvitery, što stralba idzie pakul tolki za miežami horada.
Pry hetym hubiernatar Danieckaj vobłaści Siarhiej Taruta paviedamiŭ ab tym, što nijakaha šturmu Maryupala ciapier niama.
Raniej ahienctvu «Interfaks» u «Danieckaj narodnaj respublicy» raspaviali, što sieparatysty pačali aktyŭnuju fazu apieracyi, kab uziać Maryupal — tut znachodzicca danieckaja abłasnaja administracyja — pad svoj kantrol.
Miž tym, jak adznačaje ahienctva, daradca ministra abarony Ukrainy Alaksandr Daniluk zajaviŭ, što ŭkrainskija vajskoŭcy adbili nastup bajcoŭ «DNR» na Maryupal.
Boj pamiž ukrainskaj armijaj i sieparatystami idzie la siała Šyrokina, jakoje znachodzicca pamiž Novaazoŭskam i Maryupałam.