Pasoł Biełarusi ŭ Indyi i pa sumiaščalnictvie ŭ Šry-Łancy i Banhładeš Vital Pryma ŭručyŭ davierčyja hramaty prezidentu Niepała Ramu Baranu Jadavu. 

Jak paviedamlaje pres-słužba MZS, padčas hutarki, što adbyłasia paśla cyrymonii, baki adznačyli značny patencyjał raźvićcia biełaruska-niepalskich adnosin, padkreślili hatoŭnaść da ciesnaha supracoŭnictva ŭ palityčnaj, handlova-ekanamičnaj, kulturnaj i adukacyjnaj śfierach, paćvierdzili nieabchodnaść aktyvizacyi i raźvićcia suviaziaŭ pamiž dziełavymi kołami dźviuch krain. 

U miežach rabočaha vizitu ŭ Niepał Vital Pryma taksama pravioŭ pieramovy ź ministram zamiežnych spraŭ hetaj krainy Machiendram Bachaduram Pandejem i jaho namieśnikam. «Byli abmierkavanyja najaŭny stan dvuchbakovych adnosin i pierśpiektyŭnyja kirunki supracoŭnictva Biełarusi i Niepała z akcentam na handlova-ekanamičny składalnik. Baki pahadzilisia ź nieabchodnaściu aktyvizacyi biełaruska-niepalskich adnosin, u tym liku ŭ halinie ŭzajemadziejańnia ŭ mižnarodnych arhanizacyjach i raźvićcia narmatyŭna-pravavoj bazy», — havorycca ŭ paviedamleńni pres-słužby. 

Padčas sustrečy biełaruskaha dypłamata ź ministram adukacyi Niepała Čytraj Lekcha Jadaŭ abmierkavanyja pytańni supracoŭnictva ŭ śfiery adukacyi i mahčymaści vykarystańnia navukova-adukacyjnaj bazy Biełarusi dla padrychtoŭki kadraŭ dla Niepała.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?