Minski rajonny adździeł Śledčaha kamiteta pravodzić daśledčuju pravierku pa fakcie śmierci bieź viestak źnikłaha žurnalista Źmitra Šaŭčuka. Ab hetym paviedamiła aficyjny pradstaŭnik SK Biełarusi Julija Hančarova.
Cieła Šaŭčuka było znojdziena ŭ piatli ŭ lasnym masivie niepadalok ad pasiołka Kałodziščy Minskaha rajona 30 žniŭnia. U chodzie praviadzieńnia ahladu miesca zdareńnia i cieła zahinułaha śledčymi byli znojdzieny asabistyja rečy pamierłaha, u tym liku pašpart, sumka, vyklučany mabilny telefon, a taksama pieradśmiarotnaja zapiska.
Pryznačana sudova-miedycynskaja ekśpiertyza, zaklikanaja ŭstanavić dakładnuju pryčynu śmierci. Papiarednie ekśpierty kanstatavali, što śmierć nastupiła ad aśfiksii ŭ vyniku paviešańnia. U chodzie ahladu bačnych cialesnych paškodžańniaŭ na ciele pamierłaha nie znojdziena.
«Šaŭčuk Źmicier Vitaljevič, 1983 h. n., znojdzieny pošukavaj hrupaj. Zahinuŭ. Vykazvajem spačuvańni rodnym, blizkim i siabram zahinułaha. Administracyja nie kamientuje abstaviny hibieli znojdzienaha. Spadziajemsia na vaša razumieńnie. Dziakujem usim siabram Źmitra za aktyŭny ŭdzieł u pošukavych mierapryjemstvach, a taksama kaardynataram PRA za prafiesijny padychod da spravy», — havaryłasia ŭ paviedamleńni pošukava-ratavalnaha atrada «Anioł», raspaŭsiudžanym viečaram 30 žniŭnia.
Za niekalki hadzin da hetaha PRA «Anioł» paviedamlaŭ: «29.08 u pošukach udzielničała bolš za 60 čałaviek. Siońnia ŭdzielničaje bolš za 80. Abśledujecca terytoryja lasnoha masivu kala p. Kałodziščy».
***
Źmicier Šaŭčuk naradziŭsia u Žytomiry (Ukraina). Vyras u Minsku, kudy pierajechaŭ z baćkami. Vučyŭsia ŭ licei Biełaruskaha dziaržaŭnaha ŭniviersiteta, na histfaku BDU. Pracavaŭ karespandentam «Jeŭraradyjo», radyjo «Mir». Hraŭ u muzyčnych hurtach.
