Zasłaŭje prymie haściej Dnia biełaruskaha piśmienstva ŭžo druhi raz. Nasyčanaja paznavalnaja i zabaŭlalnaja prahrama śviata raźličana na dva dni — 6 i 7 vieraśnia, paviedamili va ŭpraŭleńni drukavanych ŚMI i źniešnich suviaziej Ministerstva infarmacyi Biełarusi.
Uračystaje adkryćcio Dnia adbudziecca na hałoŭnaj sceničnaj placoŭcy kala Haradskoha vała 6 vieraśnia.
Pa tradycyi śviatkavańniu Dnia biełaruskaha piśmienstva papiaredničaje respublikanskaja navukova-aśvietnaja ekśpiedycyja «Daroha da śviatyń» z Žyvatvornym ahniom ad Hroba Haspodniaha. Ekśpiedycyja nakirujecca 3 vieraśnia ź Minska, kancavym punktam «Darohi da śviatyń» stanie Zasłaŭje. U Nacyjanalnaj biblijatecy da Dnia biełaruskaha piśmienstva 6 vieraśnia projduć mižnarodny kruhły stoł «Suhučča: litaratura jak lusterka epochi» z udziełam biełaruskich i zamiežnych piśmieńnikaŭ i prezientacyja almanacha «Suhučča» («Sozvučije»).
U Zasłaŭi asnoŭnaje dziejańnie śviata razhorniecca na niekalkich tematyčnych placoŭkach. Tak, na centralnaj płoščy horada adkryjecca fiestyval knihi i presy, dzie buduć pradstaŭleny knihi i presa Biełarusi, ekspazicyja vydańniaŭ - pieramožcaŭ nacyjanalnaha i mižnarodnaha konkursaŭ «Mastactva knihi», fotavystaŭka «Pieramožcy», aŭtarski prajekt «U pošukach stračanaha» - vystaŭki «Minsk. Padarožža ŭ časie», «Imhnieńni Pieršaj suśvietnaj vajny» Uładzimira Lichadziedava, haziety «SB. Biełaruś siehodnia» i RVU «Vydaviecki dom «Źviazda».
U čas śviata možna budzie ŭbačyć dziejučy drukarski stanok XVI stahodździa i stanok pačatku XX stahodździa, a taksama staradaŭni sposab vytvorčaści papiery. Taksama adbudziecca prezientacyja Biblii Francyska Skaryny, nadrukavanaj pa staradaŭnich technałohijach. U čas vystaŭki «Minščyna infarmacyjnaja» adbuducca prezientacyi rehijanalnych ŚMI, biblijatek i drukarniaŭ. U dni śviata projdzie ŭšanoŭvańnie pieramožcaŭ respublikanskaha konkursu na lepšy litaraturny tvor hoda i respublikanskaj akcyi «Leta z dobraj knihaj!». Akramia taho, haściej śviata čakajuć sustrečy ź piśmieńnikami, paetami, vydaŭcami, žurnalistami, raspaŭsiudžvalnikami knihi i presy.
Na sceničnaj placoŭcy ŭ centry Zasłaŭja haściej sustrenuć «Žyvyja skulptury» (letapiscy, piśmieńniki, hieroi litaraturnych tvoraŭ), jakija stvorać atmaśfieru haradskoj vulicy epochi Aśviety. Padrychtavana kancertnaja prahrama z udziełam ansamblaŭ staradaŭniaj muzyki i teatralnych kalektyvaŭ «Zasłaŭski dvoryk», rycarskija zabavy «Pad pokryvam sivych stahodździaŭ» z majstar-kłasami pa siarednieviakovych tancach, «Falkłornaje padarožža». Muzyčnym śviata zrobiać «Maładyja hałasy Minščyny».
U dni śviata budzie pracavać dziciačaja placoŭka. Pa vuł. Savieckaj adkryjecca «Litaraturnaje kafe», dzie adbuducca konkursy, litaraturnyja viktaryny, maładziožnaja akcyja «Čytaj pa-biełarusku», prezientacyi vydavieckich prajektaŭ i šmat inšaha. Zasłaŭskaja škoła mastactvaŭ prymie navukova-praktyčnuju kanfierencyju «Zasłaŭskija čytańni», u siaredniaj škole numar 1 budzie pracavać vystaŭka-prezientacyja «Biełaruś: haścinnaść bieź miežaŭ», u Domie kultury «Śvitanak» - vystaŭki «Janka Kupała i teatr», «Jakub Kołas. Žyćcio i tvorčaść».
Adnoj z asablivaściej sioletniaha śviatkavańnia Dnia biełaruskaha piśmienstva stanie prezientacyja ahrasiadzib. Pradstaŭniki subjektaŭ turbiźniesu raskažuć ab mahčymaściach adpačynku ŭ vioscy i novych turystyčnych kompleksach. Haściej śviata pačastujuć biełaruskimi łasunkami. Svaju pradukcyju pradstaviać majstry narodnaj tvorčaści.
Da Dnia biełaruskaha piśmienstva ŭ Zasłaŭi źjavicca niekalki novych abjektaŭ. Tak, 6 vieraśnia adkryjuć pomnik zasnavalniku horada kniaziu Iziasłavu i dziciačy Park kultury i adpačynku sa štučnym vadajomam. Da śviata abnavili čyhunačnuju stancyju «Biełaruś», amfiteatr na centralnaj płoščy, Dom kultury «Śvitanak», Dom bytu i inšyja abjekty. Śpiecyjalna da śviata raspracavany novy kalcavy turystyčny maršrut, jaki achoplivaje ŭsie asnoŭnyja vydatnyja miaściny horada, u tym liku Spasa-Praabraženski chram, Haradski vał, histaryčnuju častku Zasłaŭja. U horadzie taksama płanujecca pasadzić Sad Malitvy.
Zavieršycca śviata kancertam majstroŭ mastactva i dyska-akcyjaj «Dans-batlejka». Pa tradycyi horadu - stalicy nastupnaha Dnia biełaruskaha piśmienstva budzie pieradadzieny simvaličny vympieł śviata.
Dzień biełaruskaha piśmienstva — nacyjanalnaje śviata, jakoje adznačajecca z 1994 hoda i pravodzicca z metaj prapahandy lepšych tradycyj nacyjanalnaj kultury, drukavanaha słova, duchoŭnaści biełaruskaha naroda. Tradycyjna Dzień biełaruskaha piśmienstva pravodzicca ŭ histaryčnych i kulturnych centrach, ź jakimi nieparyŭna źviazana žyćcio viadomych dziejačaŭ krainy. U roznyja hady jano adznačałasia ŭ Połacku, Turavie, Navahrudku, Niaśvižy, Oršy, Pinsku, Zasłaŭi, Mścisłavie, Miry, Kamiancy, Pastavach, Škłovie, Barysavie, Smarhoni, Chojnikach, Hancavičach, Hłybokim, Bychavie.
