U sudzie Kastryčnickaha rajona Minska 29 lipienia pačaŭsia praces pa spravie kiraŭnika pryvatnaj infarmacyjna-aśvietnickaj ustanovy «Płatform inaviejšn» Andreja Bandarenki.
fota BiełaPAN
Andrej Bandarenka abvinavačvajecca ŭ chulihanstvie, złosnym chulihanstvie i asabliva złosnym chulihanstvie (maksimalny termin — da 10 hadoŭ pazbaŭleńnia voli).
Sudździa na pracesie — Ała Abakunčyk, jakaja, darečy, vynosiła prysud pa spravie ab hibieli pacyjentki «Ekamiedservisa» Julii Kubaravaj.
Ała Abakunčyk admoviła ŭ dziasiatku chadajnictvaŭ Andreja Bandarenki, nie dazvoliŭšy, u tym liku, dałučyć šerah rečaŭ, a taksama admoviła vyklikać niekalki śviedak, u tym liku miedekśpierta.
Jana zajaviła, što ciapier nie bačyć sensu ŭ hetym, mahčyma, heta budzie zroblena paźniej.
Siońnia prachodzić dopyt Andreja Bandarenki, u abvinavačvańni fihurujuć try epizody.
Pieršy adbyŭsia ŭ lutym 2014 h., kali, pavodle viersii śledstva, kala kaviarni «Staražytnaja lehienda» na vuł. Aeradromnaj u Minsku, Bandarenka nie mienš za adzin raz udaryŭ pa tvary sp. Javorskaha.
Na sudzie Javorskaha niama, a Bandarenka pa hetym epizodzie admoviŭsia davać pakazańni, adnak zajaviŭ, što nie biŭ čałavieka.
Nastupnyja epizody źviazanyja pamiž saboj, u ich fihurujuć susiedki Bandarenki — Taćciana Radzivon i jaje maci Natalla Travulka.
27 sakavika Bandarenka kala hadziny nočy viartaŭsia z kaviarni razam ź siabram Alejnikavym. Jany vypili paŭlitra harełki (a 9 hadzinie viečara), kala padjezda stali pakuryć, kali sustreli Taćcianu Radzivon. Jana (była napadpitku) prapanavała padniacca da jaje, na piaty pavierch (Bandarenka žyvie na trecim), dzie praciahnuć viečar.
Bandarenka admoviŭsia, bo na ranicu jany źbiralisia jechać u Brest.
Zatym Bandarenka, Alejnikaŭ i Radzivon zajšli ŭ padjezd, padnialisia na treci pavierch, dzie žyvie Bandarenka, jon adamknuŭ dźviery, i pichnuŭ u kvateru Alejnikava, skazaŭšy: «Bankiet skončany».
Paśla hetaha jon uziaŭ za plečy Radzivon, raźviarnuŭ, jana paviarnułasia i schapiła Bandarenku za miziniec i nie apuskała.
Bandarenka sprabavaŭ vyrvacca, urešcie vyrvaŭ ruku, ale jon nie zdoleŭ patłumačyć ci nanosiŭ udary.
Žančyna praciahvała aburacca, Bandarenka ŭvajšoŭ u kvateru, kab vyklikać milicyju. Viarnuŭsia na leśvičnuju placoŭku, ale vyśvietliłasia, što Radzivon taksama vyklikała milicyju.
Urešcie ŭsich čatyroch advieźli ŭ kastryčnicki RUUS (ź piataha paviercha spuściłasia maci Taćciany Radzivon — Natalla Travulka).
Bandarenka zaznačaje, Alejnikava zabrali brać pakazańni, a na jaho adras hučali roznyja niepryjemnyja słovy ad žančyn.
Pa jaho słovach, jon pasprabavaŭ abstrahavacca, sieŭšy na łavačku. zapluščyŭ vočy, i ŭ niejki momant adčuŭ, što nad im niechta schilajecca, adčuŭ uspyšku — nahoj admachnuŭsia, vybiŭšy mabilnik z ruk.
Potym znoŭ zapluščyŭ vočy, znoŭ jamu padałosia, što nad im niechta schilajecca, jašče raz admachnuŭsia nahoj i trapiŭ Travulcy ŭ tvar. Paśla pabačyŭ, što žančyna źbiraje telefon.
Bandarenka skazaŭ, što nie bačyŭ epizodu, a dumaŭ, što znoŭ da jaho čaplajucca sa ŭspyškaj.
Jon zaznačyŭ, što jamu ščyra škada, što tak adbyłosia, prašu prabačeńnia ŭ žančyn, — skazaŭ jon. U toj ža čas jon padkreśliŭ, što nijakich chulihanskich namieraŭ u jaho nie było. Jon pryznaje incydent, što jon mieŭ miesca, ale nie pryznaje, što heta była «chulihanka».
Zaraz na sudzie pierapynak, zatym praciahniecca dopyt Bandarenki.
«Ja jamu taksama daravała»
29-hadoavaja Taćciana Radzivon dała zusim adroznyja śviedčańni. Pa jaje słovach, jana była na sustrečy ź siabroŭkaj u toj viečar. Vypiła kala 2 litraŭ piva. I pryjšła da maci, kab zabrać syna i sabačku (maci — susiedka Bandarenki). Kala padjezdu sustreła Bandarenku i Alejnikava. I mienavita apošni chacieŭ ź joj paznajomicca. Razmaŭlali, žartavali. Zatym vyjšła jaje maci, Natalla Travulka, i paklikała dadomu. Kaža, što nikoha nie zaprašała praciahnuć viečar u siabie. Kali padymalisia, dačka zatrymałasia na kalidory z Alejnikavym. Ale Banadrenka vykazaŭsia hruba da siabra. «Kali ty zaraz nie pojdzieš dadomu, ja vykinu tvaje rečy», — uspaminaje jaho słovy žančyna. Radzivon raźviarnułasia, kab z novym znajomcam padniacca vyšej, jak adčuła šturšok u plečy. Paviarnułasia, a tam Banadarenka. Paśla, pa jaje słovach, jana atrymała udar pa hałavie. Kali zakryčała, z 5 paviercha vybiehła jaje maci, vyskačyŭ Alejnikaŭ, jaki pačaŭ ich razdymać. Ale da hetaha paśpieła atrymać jašče kolki ŭdaraŭ. «Ja chaču zabycca na heta jak na strašy son», — usio paŭtarała Radzivon. Nie admaŭlaje, što ŭkusiła kryŭdziciela. Ale tolki ŭ znak abarony.
Jana i vyklikała milicyju. Paśla heta ž zrabiŭ i Bandarenka. Takuju ahresiju ź jaho boku jana nie razumieje. Kaža, što kali ich pryvieźli ŭ Kastryčnickaje RUUS, Andrej razvaliŭsia na łavie. Jaje heta aburyła. Pasprabavała jaho sfatahrafavać na mabilnik. Na trecim zdymku, kali spracavała ŭspyška, Bandarenka machnuŭ nahoj i vybiŭ mabilnik. Toj razhlacieŭsia na try častki. Druhi raz machnuŭ, kali prosta kala jaho noh užo Natalla Travulka padymała častki ad telefona — trapiŭ u voka. Ale jon nie bačyŭ, kaho bje — siadzieŭ z zapluščanymi vačyma.
Na pracesie vyśvietliłasia, što častku 3 artykuła 339 KK Bandarenku prypisvajuć tolki za toje, što jon klučami stuknuŭ Radzivon pa hałavie (klučy pryznali zbrojaj). Ale na pracesie žančyna zajaviła, što ŭdar moh być i nie klučami — dakładna nie bačyła. A heta moža kaardynalna źmianić spravu.
Cikava, što spačatku Radzivon napisała zajavu dla pryciahnieńnia Banadarenki da administracyjnaj adkaznaści (heta byli b sutki ci štraf). A paźniej, jak prabili pa bazie, da jaje padyšoŭ milicyjant i skazaŭ, što «budziem pisać na kryminalnuju spravu». Žančyna pierapisała zajavu.
Vyjaviłasia taksama, što Bandarenka pierad samym aryštam, 30 krasavika, zachodziŭ da Travulki i jaje dački. Vybačaŭsia, prasiŭ napisać zajavu, što pretenzij da jaho žančyny nie majuć. Tyja i pahadzilisia, paprasili tolki prynieści ŭzor takoj zajavy. Kali na ranicu Bandarenka znoŭ zajšoŭ, adrazu ž za im pryjšoŭ čałaviek u cyvilnym, jaki prosta vyšturchnuŭ jaho z kvatery — nie daŭ navat pahavaryć. I Bandarenku aryštavali.
Ni Travulki, ni Radzivon nie chočuć, kab Bandarenku pasadzili.
«Chaču, kab jon hadavaŭ svaju dačku»,
— niekalki razoŭ paŭtaryła Radzivon. «Ja jamu taksama daravała», — skazała Travulka.
U pracesie abvieščany pierapynak da 31 lipienia.
* * *
Maksimalnaje pakarańnie pa spravie — 10 hadoŭ pazbaŭleńnia voli. Bandarenka znachodzicca pad vartaj.
Pravaabarončaj dziejnaściu Bandarenka zaniaŭsia paśla taho, jak pravioŭ za kratami amal dva hady pa abvinavačańni va ŭčynieńni ekanamičnaha złačynstva. U sakaviku 2011 hoda Minski haradski sud pryznaŭ Bandarenku nievinavatym, a ŭ červieni taho ž hoda jon zasnavaŭ «Płatformu» — arhanizacyju, jakaja zajmałasia abaronaj pravoŭ čałavieka ŭ miescach pazbaŭleńnia voli. U kastryčniku 2012 hoda «Płatforma» była likvidavana rašeńniem Minskaha haspadarčaha suda, paśla čaho Bandarenka i jaho adnadumcy zasnavali novuju arhanizacyju — «Płatform inaviejšn».
