Adrazu dva biełaruskija banki paciarpieli ad dziejańniaŭ chitraha złodzieja, jaki «razvodziŭ» kasiraŭ padčas abmienu valuty.
Jak paviedamlaje HUUS Minharvykankama, u Savieckaje RUUS stalicy źviarnulisia pradstaŭniki dvuch bankaŭ, filijały jakich raźmieščanyja na terytoryi rajona. Sutnaść zajaŭ zvodziłasia da taho, što ŭ chodzie valutna-abmiennych apieracyj pakul nieviadomy mužčyna (jaho šukaje milicyja) šlacham padmanu kasiraŭ zavałodaŭ hrašovymi srodkami ŭ pamiery 6.400.000 i 5.800.000 rubloŭ, adpaviedna.
Schiemu złačynstva apieratyŭniki Savieckaha RUUS Minska zmahli zrazumieć paśla vyvučeńnia zapisaŭ z kamier videanazirańnia.
Mužčyna źviartaŭsia da kasira z prośbaj abmianiać niejkuju sumu. Pieradaŭšy hrošy, «klijent» kłaŭ na stojku svaju sumačku, robiačy vyhlad, što razmaŭlaje pa telefonie. Paśla afarmleńnia abmiennaj apieracyi, rabotnik banka pieradavała mužčynu sumu hrošaj u biełaruskich rublach. Dalej mužčyna nibyta prypyniŭšy telefonnuju razmovu, braŭ u ruki hrošy i kazaŭ, što prasiŭ abmianiać valutu na rasijskija rubli.
U hety momant jon adnoj rukoj załomvaŭ častku kupiur i chavaŭ ich pad stojku, a astatnija viartaŭ.
Kasir, nia pieraličvajučy hrošy znoŭku (bo z pola zroku jany nie źnikali), vydavała mužčynu hrošy ŭžo ŭ rasijskich rublach.
