Vystavu «Dziesiać viakoŭ mastactva Biełarusi», jakaja prachodzić u Nacyjanalnym mastackim muziei z 27 sakavika, ubačyli kala 24 tys. naviedvalnikaŭ. Ab hetym siońnia na ŭračystym zakryćci ekspazicyi paviedamiŭ hienieralny dyrektar muzieja Uładzimir Prakapcoŭ.
Pa dadzienych na 7 lipienia, kvitki na vystavu kupili 13.960 haściej. Jašče 10 tys. paznajomilisia ź joj padčas akcyi «Noč muziejaŭ». Ź pieršaha dnia pracy ŭ muziei praviedziena 320 ekskursij, a ŭ knizie vodhukaŭ pakinuta 703 zapisy. Da vystavy byŭ raspracavany katałoh (papiarovaja i elektronnaja viersii) i aŭdyjahid na troch movach - biełaruskaj, rasiejskaj i anhlijskaj. Padčas pracy ekspazicyi byŭ pradadzieny 51 papiarovy katałoh, 243 katałohi ŭ elektronnaj viersii i 531 aŭdyjahid. Supracoŭniki muzieja taksama ŭviali ŭ ekspłuatacyju admysłovuju mabilnuju viersiju sajta - sistemu QR-kodaŭ, jakaja dazvalaje z dapamohaj mabilnaha telefona sčytvać infarmacyju ab tvory. Padčas ekspazicyi naviedniki zmahli ŭbačyć piać kancertaŭ i pabyvać na čatyroch lekcyjach na temu «Mastackija abjadnańni Biełarusi».
Pavodle słoŭ Uładzimira Prakapcova, praviadzieńnie ekspazicyi «Dziesiać viakoŭ mastactva Biełarusi» stała dla muzieja sapraŭdnym majstar-kłasam. «Heta znakavy prajekt nie tolki hoda, ale i dziesiacihodździa, jaki daŭ nam mahčymaść viarnucca da svaich karanioŭ», — adznačyŭ jon. Darečy, ekspazicyju źbirajucca pradstavić na II Nacyjanalnym muziejnym forumie ŭ Homieli ŭ vieraśni. Prajekt acanili nie tolki ŭ Biełarusi — vystavu chočuć bačyć u siabie muziejščyki Kitaja i Polščy.
Paznajomicca z najlepšymi tvory nacyjanalnaha mastactva achvotnyja jašče mohuć da 10 lipienia. Upieršyniu ŭ adnoj vystaŭnaj prastory pradstaŭlena kala 500 pradmietaŭ ad časoŭ Vizantyi da sučasnaści z 29 muziejaŭ krainy, karparatyŭnych fondaŭ i pryvatnych kalekcyj.
Dyjamientami ekspazicyi stali tvory mastakoŭ z suśvietnymi imionami, čyja tvorčaść da hetaha času nie było pradstaŭlena ŭ Biełarusi. Upieršyniu minčanam pakazali karcinu Chaima Sucina «Jeva» (1928) - samy darahi ekspanat. Pałatno było nabyta na aŭkcyjonie Sotheby's u Ńju-Jorku za $ 1 młn 860 tys. Taksama naviedniki ŭpieršyniu zmahli pahladzieć knihu Simiaona Połackaha «Žazło praŭleńnia» 1667 vydańnia, karciny Marka Šahała, stvoranyja ŭ pieryjad roskvitu tvorčaści vialikaha mastaka, a taksama pracu Valencija Vańkoviča «Partret paeta Tamaša Zana».
Arhanizatary prajekta — AAT «Biełhazprambank» sumiesna z AAT «Hazprom transhaz Biełaruś», Ministerstvam kultury i Nacyjanalnym mastackim muziejem Biełarusi.
