Zvyčajna ab pryznačeńni i vyzvaleńni ad pasadaŭ klučavych fihur siłavoha błoku pres-słužba prezidenta infarmuje rehularna i apieratyŭna. Adnak z hetaha praviła niadaŭna adbyłosia vyklučeńnie.
Kali pryznačeńnie Leanida Dziadkova namieśnikam staršyni Kamiteta dziaržaŭnaj biaśpieki (KDB) było praanansavanaje, to pra jaho adstaŭku nijakaj aficyjnaj infarmacyi nie było.
Nahadajem, što letam minułaha hoda Alaksandr Łukašenka raskazaŭ ab zatrymańni supracoŭnika biełaruskich śpiecsłužbaŭ, jaki pracavaŭ na zamiežnyja dziaržavy.
«My niadaŭna zatrymali adnaho sa zdradnikaŭ, jaki ŭ śpiecsłužbach słužyŭ i jaki byŭ praz pradstaŭnikoŭ Katalickaj carkvy źviazany z zamiežnymi dziaržavami,
i nie tolki zdavaŭ infarmacyju, ale z-za jaho dziejnaści paciarpieli ludzi, jakija pracujuć za miažoj», — zajaviŭ Łukašenka.
Nieŭzabavie paśla hetaha byŭ zatrymany ksiondz Uładzisłaŭ Łazar. Imia siłavika trymali ŭ sakrecie.
Uvosień žurnalisty zaŭvažyli, što na sajcie KDB ź pieraliku namieśnikaŭ staršyni viedamstva źnikła proźvišča hienierał-majora Leanida Dziadkova.
Jon kuryravaŭ pytańni źniešniaj raźviedki. Toj fakt, što zhadka pra Dziadkova prosta źnikła biez anijakich aficyjnych paviedamleńniaŭ, mahło śviedčyć pra jaho «cichuju» adstaŭku. Zrešty, heta mahło śviedčyć i pra časovaje adchileńnie hienierał-majora ad pasady.
Ale 4 krasavika sioleta Alaksandr Łukašenka pryznačyŭ namieśnikam staršyni Kamiteta dziaržbiaśpieki pałkoŭnika Aleha Čarnyšova, jaki raniej kamandavaŭ antyterarystyčnym centram i śpiecpadraździaleńniem «Alfa». Tym samym stała kančatkova zrazumieła, što Dziadkoŭ byŭ zvolnieny ukazam prezidenta, na jaki byŭ nakładzieny hryf sakretnaści, u suviazi z čym ukaz nie byŭ aficyjna apublikavany va ŭstanoŭlenym paradku, miarkuje błohier d-zholik.
Leanid Dziadkoŭ naradziŭsia ŭ kastryčniku 1964 hoda. U lipieni 2008 h. byŭ pryznačany načalnikam UKDB pa Bresckaj vobłaści, da hetaha źjaŭlaŭsia namieśnikam načalnika UKDB pa Minsku i Minskaj vobłaści. Zvańnie pałkoŭnika, jamu było prysvojena 26 maja 2004 hoda. U studzieni 2010 hoda staŭ namieśnikam staršyni KDB. Praz 2 hady ŭkazam prezidenta Dziadkovu było prysvojenak voinskaje zvańnie hienierał-majora. U 2011 hodzie jon uvajšoŭ u śpis biełaruskich čynoŭnikaŭ, nieŭjaznych na terytoryju Jeŭrasajuza.
Cikava, što ŭ vieraśni 2012 hoda ŭ vioscy Zamoście Słuckaha rajonu Leanid Dziadkoŭ ŭdzielničaŭ u adkryćci pamiatnaha znaka ŭ honar Michaiła Mukasieja — lehiendarnaha savieckaha raźviedčyka, imia jakoha i małaja častka zasłuh była rassakrečanaja tolki niadaŭna. Jon razam sa svajoj žonkaj vykonvaŭ zadańni ŭ dziesiatkach krain śvietu na niekalkich kantynientach. Mukasiej źjaŭlajecca aŭtaram šmatlikich padručnikaŭ i vučebnych dapamožnikaŭ dla raźviedškoł.
Leanid Dziadkoŭ, vystupajučy na adkryćci pamiatnaha znaka, źviarnuŭ uvahu ŭdzielnikaŭ na toje, što lehiendarny raźviedčyk ŭsie svaje apieracyi pravioŭ biezdakorna i nie byŭ raskryty.
U mnohich vypadkach jaho infarmacyja i jaho dziejnaść mieła dla SSSR stratehičnaje značeńnie, skazaŭ jon.
U KDB paćvierdzili zvalnieńnie Leanida Dziadkova, ale ad kamientaroŭ admovilisia.
