Hetyja abjekty ź niestandartnaj architekturaj zrobiać stalicu Biełarusi cikaviejšaj.
Dana Mall (Šviejcaryja)
Kampanija Dana Holdings, centralny ofis jakoj znachodzicca ŭ zachodnie-šviejcarskim horadzie Naŭšatele, źjaŭlajecca staražyłam na rynku Uschodniaj Jeŭropy. Pieršyja prajekty ŭ halinie nieruchomaści byli tut realizavany joj jašče ŭ 1980-ch hadach. Na siońniašni dzień za plačyma kampanii — bolš za paŭtysiačy prajektaŭ.
U naš ahlad nie moh nie patrapić jaje prajekt — handlova-zabaŭlalny centr u kompleksie «Majak Minska», jaki prasłaviŭsia ŭ minułym hodzie atrymańniem prestyžnaj premii World Finance Awards 2013 u naminacyi «Lepšy šmatfunkcyjanalny kompleks Uschodniaj Jeŭropy».
Dana Mall stanie samym vialikim handlovym centram nie tolki ŭ Biełarusi. Płošča ŭ 200 tys. kv.m. pakinie za saboju ŭsie hipiermarkiety Litvy. Da prykładu, ahulnaja płošča Ozas'a składaje 180 tys. kv.m. Akramia hetaha, budynak budzie mieć niezvyčajnuju architekturu i dyzajn interjeru. Apošni raspracavany brytanskaj kampanijaj Benoy.
TRC budzie zajmać 3 pavierchi. Handlovyja pradpryjemstvy buduć raźmiaščacca na pieršym i druhim. Vierchni pavierch addaduć pad zabaŭlalnyja ustanovy i fud-korty. Siarod inšaha na im buduć znachodzicca kinateatr i fitnes-centr.
Z boku Nacyjanalnaj biblijateki ŭzvodzicca 11-paviarchovy Dana Center płoščaj 26000 kv.m. Akramia ofisaŭ i bankaŭ u im buduć raźmiaščacca elitnyja apartamienty.
Zdać kompleks u ekspłuatacyju abiacajuć u pieršym kvartale 2015 hoda. Hledziačy na aktyŭnyja budaŭničyja pracy, nie ŭźnikaje sumnieńnia, što terminy zdačy buduć sarvanyja.
Žyły dom nacyjanalnaha alimpijskaha kamiteta (Biełaruś)
Žyły 24-paviarchovy dom budujecca pa zamovie NAK na vuł. Filimonava, kala Nacyjanalnaj biblijateki. PP «Alimpijskija prajekty» adkazvajuć za technahlad, SM ZAT «Aresa-Servis-Bud» źjaŭlajecca padradčykam.
Budynak budzie mieć niezvyčajny skałapadobny dach, za jaki dziakuj RUP «Instytut «Biełdziaržprajekt». Mienavita dziakujučy jamu bułynak byŭ uklučany ŭ naš ahlad. Spadziajemsia, što ad jaho nie admoviacca.
U pašparcie abjekta ŭ hrafie «Pačatak rabot» značycca kastryčnik 2012 hoda. Za hety vialiki pieryjad času nie pabudavany navat pieršy žyły pavierch. Budynak abiacajuć zdać u pieršym kvartale 2015 hoda, ale, mabyć, jak u nas časta byvaje, datu ŭvodu ŭ ekspłuatacyju pierahledziać.
Centr frystajłu+akvapark (Biełaruś)
Čarhovaja dziaržaŭnaja budoŭla ŭ našym ahladzie i čarhovy daŭhabud. Dadzieny spartyŭny kompleks, jaki budujecca na vuł. Suhanova, abiacali zdać jašče niekalki hadoŭ tamu, ale tolki ŭ biahučym hodzie budaŭniki vyjšli na finišnuju pramuju. U pašparcie abjekta značycca, što budaŭničyja pracy buduć zavieršany ŭ vieraśni. Cikava, što hrafa «Zakančeńnie rabot» ujaŭlaje saboj prostuju papierku, prymacavanuju skotčam. Pad joj značycca pieršaja data zdačy — červień 2012.
Zamoŭcam budaŭnictva Centra frystajłu vystupaje RUP «Dyrekcyja abjektaŭ, jakija budujucca Minsportu». Prajektnaja arhanizacyja — RUP «Biełpramprajekt».
Spartyŭny kompleks budzie składacca z basiejna 20 na 30 mietraŭ (najbolšaja hłybinia — 5 m.), troch tramplinaŭ dla adzinočnych, padvojnych i patrojnych salta z daŭžynioj razhonu da 70 mietraŭ, a taksama kompleks tramplinaŭ i vyšak dla skačkoŭ u vadu.
Zabaŭlalnaja častka budzie ŭklučać akvapark z tryma basiejnami, džakuzi, kala 20 roznymi atrakcyjonami i łaźnievym kompleksam, zały dla chareahrafii, aerobiki, siłavoj padrychtoŭki, trenažornaja zała. U centry buduć pracavać boŭlinh i biljard.
Handlova-administracyjny kompleks «Dynama» (Biełaruś)
Na miescy źniesienaha 2-paviarchovaha budynka pa vuł. Kirava, dzie raźmiaščalisia biletnyja kasy i firmovy mahazin, dabudoŭvajecca novy. Jaho dyzajn raspracavany śpiecyjalistami «Biełzamiežbud». Prajekt vyjšaŭ dosyć niezvyčajnym dla Minska. Pieršapačatkova płošča škleńnia pavinna była być mienšaj, a paviarchovaść bolšaj.
Pieršyja dva pavierchi kompleksu zojmuć handlovyja płoščy. Vyšej buduć raźmiaščacca ofisy, nižej, u padziemnaj častcy, — parkinh.
Suprać budaŭnictva hetaha budynka vystupaŭ hałoŭny architektar «Minskprajekta» Michaił Hauchfield. Jon nahadaŭ, što pa hienpłanie raźvićcia horada tut pavinna znachodzicca łandšaftna-rekreacyjnaja zona sa spartovym uchiłam. Da śpiecyjalista nie prysłuchalisia.
Šmatfunkcyjanalny kompleks «Ścikleva» (Biełaruś)
Čarhovy budynak ź cikavaj architekturaj uzvodzicca ŭ rajonie st.m. «Mahiloŭskaja», z advarotnaha boku MKAD. Ahulnaja płošča budynka składzie 7,3 tys. kv.m. Akramia ofisaŭ, u im buduć raźmiaščacca dźvie kanfierenc-zały na 60 i 100 miescaŭ, vystavačnaja zała i kaviarnia. Apošni, 11 pavierch, budzie techničnym; na im budzie raźmieščany vychad u zimovy sad.
Prajektam praduhledžana sučasnaja padśviatleńnie kompleksu pa anałohii z Nacyjanalnaj biblijatekaj i BC «Farenhiejt» na vuł. Prytyckaha. Pražektary buduć zaprahramavanyja na roznyja scenary.
Hienpadradčykam abjekta vystupaje TAA «Manalit hrup», zamoŭcam — PVUP «Inviest MFK». Zdača abjekta płanujecca ŭ śniežni hetaha hoda.
VK «Dziuna» (Biełaruś)
Daloka nie kožny žyły dom maje ŭłasnuju nazvu. Dadzieny budynak uzvodzicca na skryžavańni pr. Dziaržynskaha i vuł. Čurlonisa, nasuprać Studenckaj vioski, i svajoj architekturaj maje da jaho pramoje dačynieńnie. Źniešnim abliččam budynak abaviazany Minskprajektu.
Kančatkovy vyhlad doma ŭžo prahladajecca i da kanca biahučaha hoda jon pavinien być zdadzieny. U budynku taksama buduć raźmieščanyja supiermarkiet, pramtavarnyja kramy, trenažornaja zała, bar, a taksama ofisny błok.
Zabudoŭščykam vystupaje TDA «Ajran».
Novy ofis «Biełhazprambanka» (Rasija)
Novy ofis banka dabudoŭvajecca kala HC «Skała» na vuł. Prytyckaha. Budynak abiacaje stać adnym z samych niezvyčajnych u Minsku. Bo pracy vychodziać na finišnuju pramuju, pra jaho budučaje abličča možna mierkavać užo ciapier. Tym bolš, jon budujecca ŭ poŭnaj adpaviednaści z pradstaŭlenym publicy eskizam.
Budaŭnictva hetaha budynak abyšłosia banku prykładna ŭ 20 młn dalaraŭ. U padmurak zakładziena kapsuła z załatoj manietaj 999-j proby vahoj 36 hramaŭ, inkrustavanaja dyjamientami.
Novy ofis banka budzie mieć adkrytyja terasy, na jakich vysadziać viečnazialony dekaratyŭnyja drevy: tui, jadłoviec, kiparysy.
Budynak uzvodzicca pa prajekcie architekturnaj majsterni Michaiła Vinahradava i byŭ stvorany ŭ 2009 hodzie. Dla tych, kamu hetaje proźvišča ni pra što nie skazała, jon źjaŭlajecca aŭtaram budynkaŭ Nacyjanalnaj biblijateki i Čyhunačnaha vakzała.
Płošča banka składzie kala 14 tys. kv.m. U ekspłuatacyju jon budzie ŭviedzieny ŭ druhoj pałovie biahučaha hoda.
TZC «Hulivier» (Biełaruś—ZŠA)
Adzin z najbujniejšych va Uschodniaj Jeŭropie handlovych centraŭ budzie adkryty ŭ rajonie st.m. «Puškinskaja». Jon budzie mienšy za oj, jaki buduje Dana Mall, 130 tys. kv.m. płoščy suprać 200, ale heta taksama šmat. Heta bolš, čym maje vilenski Akropolis.
U skład kompleksu, akramia handlovych płoščaŭ, buduć uvachodzić zony hramadskaha charčavańnia, kulturna- zabaŭlalnyja i spartyŭnyja zony, 6-uzroŭnievy parkinh i administracyjna-ofisnyja pamiaškańni.
Buduje abjekt kampanija «Aresa-Servis» Siarhieja Karańko. Z 2002 hoda 45% akcyj hetaj kampanii naležyć amierykanskaj vienčurnaje hrupie TSYN Group Int. Inc.
Green City (Rasija)
Budaŭnictva čarhovaha adnaho z najbujniejšych handlova -zabaŭlalnych centraŭ Uschodniaj Jeŭropy (83 tys. Kv.m.) viadziecca na zachodnim ŭskrajku Minska, u mikrarajonie Kamiennaja Horka. Kompleks abiacali zdać u 2014 hodzie, ale, chutčej za ŭsio, budaŭnictva skončycca paźniej. Akramia ofisnaha centra i hipiermarkieta, jon budzie ŭklučać haścinicu (59 numaroŭ) i fitnes-kłub.
Na pieršym paviersie handlovaha centra raźmieściacca čatyry restarany. Heta restaran azijackaj kuchni Yoshi, piŭny restaran, piceryja Terra Pizza, a taksama Golden Coffee.
Zabudoŭščykam abjekta źjaŭlajecca inviestycyjnaja kampanija STAA «JevroStepHrupp», stvoranaja na bazie rasiejskaha kapitału. Budaŭnictva kompleksu abyjšłosia joj u 110 młn dalaraŭ.
Riviera Plaza (Biełaruś)
Pieršy administracyjna-ofisny błok biznes-centra płanujecca ŭvieści ŭ ekspłuatacyju da kanca hetaha hoda. Druhaja čarha budaŭnictva — administracyjna-ofisny błok № 2 — budzie zdadzieny ŭ 2015 hodzie. Błok № 3 i SPA-centr dabudujuć da 2016 hoda. Kompleks budujecca na pr. Pieramožcaŭ, nasuprać Minsk-Areny.
Prajekt pa budaŭnictvie biznes-centra vykonvajecca pa zamovie i pry kuratarstvie TAA «Zavod Bulbaš». Kampanija pracuje ŭ supracoŭnictvie z hienpadradčykam TAA «BU-1 BiełBud». Prajekt raspracavaŭ architektar Barys Školnikaŭ.
Ahulnaja płošča kompleksu składzie 33 tys.kv.m. Płošča SPA- centra składzie 6800 kv.m. Jon budzie ŭklučać 20 vidaŭ łaźniaŭ i saŭnaŭ, 13 basiejnaŭ i ŭnikalny dla Minska SPA-kinateatr.
Šmatfunkcyjanalny kompleks «Sokał» (Katar)
Zamoŭcam hetaha, adnaho z samych cikavych budynkaŭ krainy, źjaŭlajecca TAA «Inviestycyjnaja kampanija «Sokał». Inviestar — Fond uzbrojenych sił Katara. Prajekciroŭščykam, hałoŭnym inžynieram i padradčykam źjaŭlajecca biełaruska-litoŭskaje STAA «Mahnus hrup» (stvoranaje na bazie TAA «Trajpł» Juryja Čyža). U hrafie «Zakančeńnie budaŭnictva» na pašparcie abjekta značycca data 2014/03/01, adnak rabot jašče chapaje.
Svajoj niezvyčajnaj architekturaj budynak abaviazany śpiecyjalistam kampanii «Varabjoŭ i partniory».
Akramia spartyŭnaha kompleksu, tut budzie raźmiaščacca 5-zorkavy hatel Marriott. Budaŭnictva viadziecca na pr. Pieramožcaŭ kala futbolnaha manieža.
