U Biełarusi svaboda pa ŭzory Ukrainy pryviadzie da źjaŭleńnia mnostva prarasiejskich siłaŭ. Takoje mierkavańnie žurnalistam vykazaŭ były saviecki dysydent biełarus Michaił Kukabaka, jaki 24 krasavika vystupiŭ na adkrytaj sustrečy ŭ Minsku, kudy pryjechaŭ upieršyniu za apošnija 15 hadoŭ.
Kukabaka žyvie ŭ Maskvie, adnak uvieś čas sočyć za padziejami ŭ palityčnym žyćci Biełarusi. Jon adznačyŭ, što «krytyčna» stavicca da Alaksandra Łukašenki, ale nie padtrymlivaje sankcyi ŭ dačynieńni da palityčnaha kiraŭnictva krainy.
«U siońniašnich umovach, kali nie ličyć zališnie surovych pakarańniaŭ, jon [Łukašenka] trymajecca maksimalna, nakolki heta mahčyma, aptymalnych varyjantaŭ [raźvićcia Biełarusi], — skazaŭ Kukabaka. — Pahladzicie, što adbyvajecca z Ukrainaj. Kali b u Biełarusi abjavić takuju svabodu, jak va Ukrainie, to źjaviłasia b kuča prarasiejskich partyj».
Pa słovach byłoha dysydenta, prezidenta Biełarusi treba «choć by farmalna pavažać», tamu «dapuskać abrazy» ŭ jaho adras, ličyć jon, «nieprystojna».
«Jon, jak moža, zmahajecca za suvierenitet Biełarusi, — pierakanany Kukabaka. — Tak, treba jaho krytykavać za represii, turmy, prapanoŭvać jamu bolš aptymalnyja varyjanty viadzieńnia haspadarki, ale sprabavać damahacca ekanamičnaha ci palityčnaha bajkotu (sankcyj) — heta nieprymalna. Ja kateharyčna suprać bajkotu».
Biełaruski dysident upeŭnieny, što kiraŭnik dziaržavy «pavinien mieć absalutnuju svabodu razam z haspadarnikami naviedvać i hladzieć, jak pracujuć fiermy ŭ Hałandyi, vytvorčaść, naprykład, u Narviehii».
«Narmalny čałaviek dyalektyčny, u jaho źjaŭlajecca novaja infarmacyja, viedy, fakty, jon źmianiaje svaje pierakanańni. A kali jaho zatykajuć, jak havorycca, za žaleznuju zasłonu, jon moža ŭsio žyćcio isnavać bieź źmienaŭ,»nie prychodziačy ŭ śviadomaść», — dadaŭ Kukabaka.
