«Biahučy ramont» - novaja hrafa, jakaja moža źjavicca ŭ žyroŭkach biełarusaŭ. Apłata hetaj pasłuhi, chutčej za ŭsio, całkam laža na plečy žycharoŭ. Pakul pytańnie znachodzicca na prapracoŭcy ŭ Ministerstvie žyllova-kamunalnaj haspadarki.
Načalnik Upraŭleńnia žyllovaj haspadarki Ministerstva ŽKH Andrej Ramaška, adznačyŭ, što raniej biahučy ramont uvachodziŭ u skład rabot pa techničnym absłuhoŭvańni. I płata z nasielnictva brałasia mienavita za techabsłuhoŭvańnie, a ŭžo z hetych srodkaŭ finansavaŭsia biahučy ramont.
U sakaviku 2013 hoda ŭ Žyllovy kodeks byli ŭniesieny źmieny. Zhodna z novaj redakcyi ŽK, biahučy ramont byŭ vydzieleny ŭ asobny raździeł asnoŭnych žyllova-kamunalnych pasłuh.
Ministerstva ŽKH pakul nie vyznačyłasia, u jakoj miery žychary buduć kampiensavać zatraty pa biahučym ramoncie, bo heta davoli šyroki pieralik rabot.
Zhodna z budaŭničymi normami, siudy ŭvachodzić ramont dachaŭ i haŭbcoŭ, ramont asobnych učastkaŭ trubapravodaŭ i inžyniernych sistem, ramont učastkaŭ tratuaraŭ i prajezdaŭ, darožak i placovak. Toje ž tyčycca i ramontu abstalavańnia haspadarčych, dziciačych hulniavych, spartyŭnych placovak, łavak i h.d.
Da taho ž, apłata za biahučy ramont vyrablajecca pa fakcie vykananych rabot, tamu składana skazać, jakuju dolu ad ahulnaha koštu žyllova-kamunalnych pasłuh zojmie ŭ žyroŭkach novaja pasłuha.
Zhodna z prezidenckim ukazam № 550, padpisanym 5 Śniežnia 2013, krynicami finansavańnia biahučaha ramontu žyllovaha fondu «źjaŭlajucca srodki miascovych biudžetaŭ i srodki ad ŭniasieńnia ŭłaśnikami, najmalnikami žyłych pamiaškańniaŭ i členami arhanizacyj zabudoŭščykaŭ płaty za biahučy ramont, a taksama inšyja krynicy finansavańnia, nie zabaronienyja zakanadaŭstvam».
Heta značyć varyjantaŭ finansavańnia niekalki, ale vykarystoŭvacca, chutčej za ŭsio, budzie tolki adzin - srodki ułaśnikaŭ i najmalnikaŭ.
Pavodle infarmacyi z hałoŭnaha finansavaha ŭpraŭleńnia Minharvykankama, u biudžecie Minska na 2014 hod srodki na subsidavańnie (heta značyć na pakryćcio častki vydatkaŭ ź biudžetu) biahučaha ramontu nie praduhledžany, i žyllovym abjadnańniam pradpisvajecca finansavać hetyja vydatki z ułasnych srodkaŭ.
«Pry vyznačeńni abjomaŭ subsidavańnia ŭ raźlik pryniatyja vydatki na techničnaje absłuhoŭvańnie žyllovaha fondu (bieź biahučaha ramontu), karystańnie liftam, vyvaz śmiećcia, pierapracoŭku ćviordych kamunalnych adchodaŭ z ulikam ažyćciaŭleńnia raschodaŭ na spažyvańnie, sacyjalnyja vypłaty za košt ułasnych srodkaŭ pradpryjemstva», - adznačajecca ŭ admysłovym liście hałoŭnaha finansavaha ŭpraŭleńnia Minharvykankama, adrasavanaha meru stalicy Mikałaju Ładućka.
Skazać, kali novaja hrafa źjavicca ŭ žyroŭkach biełarusaŭ, u Ministerstvie ŽKH pakul nie mohuć.
