Heta adzin ź pieršych krokaŭ u zadumanaj biełaruskim biznesoŭcam №1 rearhanizacyi svajho šmatprofilnaha biznesu.
Adnačasova z «Rakaŭskim brovaram», jaki byŭ adkryty ŭ 1997 hodzie, u kiravańnie Pałonskamu adyšoŭ taksama restaran «U Francyska». Hetuju infarmacyju «Ježiednievniku» paćvierdzili niekalki krynic na rynku. Akramia taho, hetyja dźvie ŭstanovy ŭklučanyja ŭ dyskontnuju prahramu «Šakaład», jakaja dziejničaje va ŭsich restaranach Paŭła Pałonskaha. Hetaja infarmacyja raźmieščanaja na sajcie hrupy jahonych restaranaŭ.
Pałonski ličycca adnym z samych paśpiachovych biełaruskich restarataraŭ,
a jon pačynaŭ biznes u 1993 hodzie z nabyćcia franšyzy «Doki-picy» va Uładzimira Doŭhania. Ciapier Pałonski — saŭładalnik i kiraŭnik hrupy restaranaŭ i kaviarniaŭ, siarod jakich «El Pamidora», «Terytoryja», «Siem pakojaŭ», «Staroje rečyšča». Pavodle peŭnych źviestak, u kiravańnie Pałonskamu ŭžo pierajšli abo mohuć pierajści ŭ najbližejšy čas i try kandytarskija «Sałodki falvarak», uładalnikam jakich jość «Trajpł».
Adznačym, što kala miesiaca tamu źjaviłasia infarmacyja, što adna z hetych kandytarskich vystaŭlenaja na tarhi razam z restaranam «Buchara», jaki taksama naležyć Čyžu. Za ich prosiać bolš za 2 młn dalaraŭ. Treba skazać, što ŭ hetym hodzie Juryj Čyž pazbaviŭsia ad jašče adnaho restarana, a taksama haścinicy ŭ Mirskim zamku. Jany byli pieradadzienyja dziaržavie na biazvypłatnaj asnovie.
Pieradača va ŭpraŭleńnie abo prodaž restaranaŭ — heta nie pieršy i, miarkujučy pa ŭsim, nie apošni krok viadomaha biznesoŭca na šlachu restrukturyzacyi svajho šmatprofilnaha biznesu.
U 2011 hodzie jon likvidavaŭ kampaniju «Trajpł-techna», jakaja razam z «Minskimi voknami» Ivana Burakoŭskaha ŭtvaryła novuju biznes-strukturu - «Minski dom voknaŭ». Cikava, što ciaham mnohich hadoŭ «Trajpł-techna» ŭznačalvaŭ Siarhiej Zielanko. Čyž znajomy ź im jašče z časoŭ Biełaruskaha biržavoha banka, dzie biznesoviec byŭ adnym z klučavych akcyjanieraŭ, a Zielanko — siabram praŭleńnia. Paśla krachu banka Zielanko pierajšoŭ u «Trajpł», a paśla zakryćcia «Trajpł-techna» znoŭ viarnuŭsia ŭ bankaŭski biznes. Ciapier Zielanko — namieśnik staršyni praŭleńnia BiełVEBa.
U apošnija miesiacy na rynku taksama źjaviłasia infarmacyja, što Čyž straciŭ cikavaść da miasapierapracoŭki i šukaje pakupnika na zavod «Trajpł-Vieles». Ale jana nie znajšła paćvierdžańnia.
Zrešty, u chołdynhu biznesoŭca kala 15 napramkaŭ, ź jakich zaŭsiody možna abrać pryjarytety. Adnym ź ich, padobna, stała staličnaja haściničnaja nieruchomaść. Niekalki tydniaŭ tamu na adras centralnaha ofisa «Trajpła» na Pieramožcaŭ 51/2 było zarehistravana STAA «Kiej Em Łakšery Choteł», jakoje chutčej za ŭsio jość sumiesnaj kiraŭničaj kampanijaj budučaha hatela Kempinski ŭ centry Minska.
