Prajekt adnaŭleńnia i muziejefikacyi Minskaha zamčyšča, raspracavany architektaram UP «Minskprajekt» Siarhiejem Bahłasavym, vyklučany z prajekta detalovaha płana rekanstrukcyi histaryčnaha centra Minska.
Takoje rašeńnie było pryniata 27 listapada na pasiadžeńni navukova-mietadyčnaj rady pa pytańniach historyka-kulturnaj spadčyny Ministerstva kultury, paviedamiŭ BiełaPAN staršynia Biełaruskaha dobraachvotnaha tavarystva achovy pomnikaŭ historyi i kultury (BDTAPHiK), historyk Anton Astapovič.
Pavodle jaho słoŭ, na hetym pasiadžeńni byli kančatkova skarektavany da 2018 hoda hrafik i rehłamienty prajekta detalovaj płaniroŭki histaryčnaha centra Minska.
Pavodle prajekta Bahłasava, na miescy Minskaha zamčyšča pavinien byŭ źjavicca nasyp z muziejnaj ekspazicyjaj usiaredzinie, płanavałasia taksama nanova pabudavać pieršuju minskuju carkvu ŭzoru XI stahodździa, siaredniaviečnuju haradskuju bramu i kvartał z draŭlanaj zabudovaj. Charaktarystyki hetych abjektaŭ, na dumku pradstaŭnikoŭ BDTAPHiK, u prajekcie Bahłasava značna adroźnivalisia ad raniej isnavaŭšych aryhinałaŭ.
«Da pačatku Druhoj suśvietnaj vajny na hetym miescy była žyłaja zabudova, jakaja spałučałasia z handlovymi radami, uklučajučy Nizki i Miasny rynki, — skazaŭ Astapovič. — Prajekt Bahłasava navukova abhruntavany nie byŭ.
Pry jaho realizacyi tam by źjaviłasia, my ličym, nie što inšaje, jak falsifikacyja historyka-kulturnaj kaštoŭnaści. Było b stvorana psieŭdazamčyšča, psieŭdasiaredniaviečny zamak na asnovie vyklučna architekturnych fantazij, navat nie na hipatetyčnym mierkavańni, jakim było abličča Minska».
Admoviŭšysia ad prapanovy Bahłasava, staličnyja ŭłady, Minkultury, a taksama raspracoŭščyki i zamoŭcy prajekta rekanstrukcyi histaryčnaha centra Minska, ličyć historyk, pryniali «vielmi mudraje i ŭzvažanaje rašeńnie», pra nieabchodnaść jakoha «BDTAPHiK havaryła na praciahu troch hadoŭ».
Tak, zhodna z rašeńniem navukova-mietadyčnaj rady, placoŭka Minskaha zamčyšča pakinuta «dla kompleksnych navukovych daśledavańniaŭ i składańnia historyka-architekturnaha apornaha płana».
«Pa vynikach kompleksnych daśledavańniaŭ i na asnovie padrabiaznaha apornaha płana paśla budzie pryniata rašeńnie, jak budzie raźvivacca adnaŭleńnie hetaj terytoryi. Abo iści šlacham uznaŭleńnia rańniesiaredniaviečnaha horada, abo šlacham adnaŭleńnia stračanaj cahlanaj architektury, jakaja skłałasia ŭ XIX stahodździ. A moža być, i šlacham spałučeńnia hetych rašeńniaŭ», — reziumavaŭ Astapovič.
