Členy Mytnaha sajuza hatovy pastupova adyści ad bolšaści vyniatkaŭ, u tym liku ekspartnych pošlin u dačynieńni da Biełarusi, ale ad šerahu vyniatkaŭ adyści, mabyć, nie atrymajecca.
Pra heta zajaviŭ žurnalistam u Minsku pieršy vice-premjer Rasii Ihar Šuvałaŭ pa vynikach pasiadžeńnia lidaraŭ MS 24 kastryčnika.Pavodle słoŭ Šuvałava, padčas sustrečy biełaruski bok paćvierdziŭ hatoŭnaść padpisać adpaviednyja dakumienty, jakija poŭnaściu likvidavali b usie vyniatki ŭ handli z Rasijaj. «Pazicyja biełarusaŭ hučyć tak: «my ŭsio hatovy padpisać biez vyniatkaŭ». Heta značyć, što našy vyniatki pa ekspartnych pošlinach u dačynieńni da ich prymianiacca nie buduć», — cytuje RIA Novosti pieršaha vice-premjera Rasii.
Šuvałaŭ dadaŭ, što siońnia składana skazać, ci mahčyma heta: Kazachstan pakul nie hatovy da takoha scenaryja, pakolki «im patrebny terminy» (dla admieny svaich vyniatkaŭ). «Ale, kali heta mahčyma jurydyčna i budzie pryznana mahčymym, my tady heta zrobim. Heta aznačaje, što z 1 studzienia 2015 hoda dla Biełarusi nie buduć prymianiać ekspartnyja pošliny», — rastłumačyŭ uradavy čynoŭnik.
Šuvałaŭ dadaŭ, što ciapierašni paradak pastavak nafty i naftapraduktaŭ u Biełarusi dziejničaje da kanca hoda, a na 2014 hod «treba ź Biełaruśsiu damaŭlacca, jak my budziem dziejničać».
Akramia taho, rasijski vice-premjer raskryŭ šerah padrabiaznaściaŭ padrychtoŭki dahavora ab Jeŭrazijskim ekanamičnym sajuzie. Pavodle jaho słoŭ, prezidenty Rasii, Biełarusi i Kazachstana damovilisia ab tym, što dahavor budzie składacca ź dźviuch častak, u pieršaj ź jakich buduć ukazany ŭsie instytuty sajuza z pravami i abaviazkami.
«Pa druhoj častcy damovilisia tak, što ad formuły «biez vyniatkaŭ i abmiežavańniaŭ» my z 1 studzienia 2015 hoda ciapier adydziem i da 1 sakavika 2014 hoda my pradstavim pieralik vyniatkaŭ, pa jakich buduć uviedzieny pierachodnyja pieryjady, pra jakija my damovimsia, i terminy, kali hetyja vyniatki pierastanuć dziejničać», — skazaŭ Šuvałaŭ.
«Takim čynam, budzie padpisany i, spadziajusia, ratyfikavany dahavor, jon pačnie dziejničać z 1 studzienia 2015 hoda, pa jakim vyniatki peŭnyja buduć zachavany, ale i ŭ hetym dahavory buduć vyznačany pierachodnyja etapy i kančatkovyja terminy, kali hetyja vyniatki pierastanuć pracavać», — rastłumačyŭ pieršy vice-premjer Rasii. U toj ža čas Šuvałaŭ dapuściŭ, što «niekatoryja vyniatki mabyć zastanucca nazaŭždy».
Pra toje, što Rasija zhodna na pastupovaje vyklučeńnie ŭsich vyniatkaŭ z režymu handlu Mytnaha sajuza, zajaviŭ prezident RF Uładzimir Pucin na pres-kanfierencyi viečaram 24 kastryčnika ŭ Minsku pa vynikach pasiadžeńnia Vyšejšaha jeŭrazijskaha ekanamičnaha savieta.
