Upraŭleńniem Śledčaha kamiteta pa Minsku praciahvajecca rasśledavańnie kryminalnaj spravy, raspačataj Kamitetam dziaržaŭnaj biaśpieki ŭ dačynieńni da zahadčycy i advakata jurydyčnaj kansultacyi, a taksama dyrektara kamiercyjnaha pradpryjemstva.
Jak paviedamili ŭ adździele infarmacyi i suviazi z hramadskaściu SK Biełarusi, atrymanyja pravaachoŭnymi orhanami dokazy źjavilisia padstavaj dla pradjaŭleńnia trom padazronym abvinavačańnia va ŭčynieńni złačynstva, praduhledžanaha č. 5 art. 16 i č. 2 art. 431 KK (saŭdzieł u dačy chabaru ŭ bujnym pamiery). U dačynieńni da abvinavačvanych prymieniena miery strymańnia ŭ vyhladzie źniavoleńnia pad vartu.
Jak paviedamlałasia raniej, hrašovyja srodki ŭ sumie 10.000 dołaraŭ ZŠA byli atrymany abvinavačvanymi pad markaj nastupnaj pieradačy słužbovym asobam pravaachoŭnych orhanaŭ za spryjalnaje vyrašeńnie pytańnia ab raspačynańni kryminalnaj spravy.
Nahadajem, 26 vieraśnia KDB paviedamiŭ ab tym, što pry atrymańni niezakonnaha hrašovaha ŭznaharodžańnia zatrymany zahadčyca i advakat jurydyčnaj kansultacyi Savieckaha rajona Minska. Niepasredna pry pieradačy hrošaj byŭ zatrymany i pasrednik — dyrektar adnaho z pryvatnych kamiercyjnych pradpryjemstvaŭ stalicy.
Hrašovyja srodki ŭ sumie 10.000 dołaraŭ ZŠA byli atrymany zatrymanymi ad žychara Minska dla dalejšaj pieradačy ŭ jakaści chabaru słužbovym asobam pravaachoŭnych orhanaŭ za spryjalnaje vyrašeńnie pytańnia ab raspačynańni kryminalnaj spravy pa fakcie ŭčynienych u dačynieńni da nazvanaha hramadzianina supraćpraŭnych dziejańniaŭ.
