Fota z Tvitara Nikitka @Nikitka93.
Na stancyjach minskaha mietro spynieny ruch ciahnikoŭ. Pres-słužba Ministerstva pa nadzvyčajnych situacyjach paviedamiła ŭ Tvitary, što kala stancyi mietro «Uschod» adbyłosia zadymleńnie ŭ vyniku karotkaha zamykańnia elektrapravodki. Rabotniki mietrapalitena evakujavali ludziej sa stancyj «Uschod» i «Maskoŭskaja», paviedamlajuć čytačy «Našaj Nivy». Nichto nie paciarpieŭ.
Zboj doŭžyŭsia prykładna ad 12.45 da 13.15. U dadzieny momant mietro adnaviła svaju rabotu.
Spačatku ŭsie padumali, što heta adbyvajecca ŭ miežach antyterarystyčnych vučeńniaŭ, što pačalisia ŭčora. Jany supali z pačatkam druhoha etapa vajskovych vučeńniaŭ «Zachad-2013», na jakich adpracoŭvajecca supraćdziejańnie ŭmiašańniu z-za miažy jak vyniku paŭstańnia ŭnutry krainy.
Pa słovach dziažurnych milicyjantaŭ i kantralorak, vučeńni buduć doŭžycca da 26 vieraśnia.
Adnak MNS zavieryła, što hetym razam u tuneli stancyi mietro «Uschod» adbyłosia realnaje karotkaje zamykańnie elektraščyta.
U vyniku ludziam daviałosia paciarpieć niazručnaści.
Tak, na stancyi «Płošča Pieramohi» ciahniki nie ruchalisia niekalki chvilin, potym pasažyram skazali vyjści ź ciahnikoŭ.
Na stancyi «Akademija navuk» ciahnika ŭ bok «Kastryčnickaj» nie było chvilin 10, u advarotny bok ciahnik stajaŭ na płatformie z adčynienymi dźviaryma i nie ruchaŭsia, raskazvaje karespandent «Našaj Nivy» Juraś Uskoŭ. Paśla z «Akademii navuk» ŭsich pasažyraŭ vyhnali. Na stancyju mietro «Maskoŭskaja» prajechali miedyki i pažarnyja.
Nahadajem, što ŭčora ŭ mietro pravodzilisia vučeńni z nadhladam pasažyraŭ i pierakryćciom stancyi «Płošča Jakuba Kołasa».
Na stancyi mietro Płošča Pieramohi kantralorka siońnia skazała karespandentu «Našaj Nivy»: «Heta ž naša kraina, heta našy hulni».
Na niekatorych stancyjach ludzi vykazvali niezadavolenaść.
Začynili stancyju mietro «Piatroŭščyna», — paviedamlaje karespandentka «Našaj Nivy» Aksana Rudovič, — Ludziej zapuścili, a potym skazali vyjści. Uźnikli pratesty, ropat. Ludzi patrabujuć viarnuć hrošy za žetony i huduć: «Kolki možna hetyja vučeńni rabić, dajcie narmalna dajechać!».