Ministerstva achovy zdaroŭja zakryła «Kliniku sučasnaj medycyny „Vektar“». Na aficyjnym sajcie medyčnaj ustanovy źjaviłasia abviestka:
«Pavažanyja naviedniki sajta! U nas zdaryłasia biada: u adnoj z pacyjentak paśla składanaj aperacyi źjaviłasia ŭskładnieńnie (na žal, chirurhii biaz hetaha nie byvaje). Ciapier jana papraŭlajecca. Ale čynoŭniki Ministerstva achovy zdaroŭja vyrašyli, što najlepšy sposab pakarańnia — heta zakryćcio centra. Z 1 žniŭnia my nie pracujem. U vyniku 22 čałavieki stracili pracu, zasnavalniki — hrošy, a tysiačy pacyjentaŭ — nadzieju i mahčymaść svajho azdaraŭleńnia.
My prynosim svaje prabačeńni, ale takaja realnaść u našaj krainie, jakaja stracić jašče niekalki vysakaklasnych specyjalistaŭ. Kali jakoj-niebudź klinicy ŭ Rasiei, Prybałtycy, Ukrainie ci Eŭropie patrebnyja specyjalisty našaha ŭzroŭniu, čakajem prapanoŭ!»
Paśla śmierci pacyjentki «Ekamedservisu» 23-hadovaj Julii Kubaravaj u vyniku praviadzieńnia plastyčnaj aperacyi pa karekcyi formy nosa, Ministerstva achovy zdaroŭja raspačało pravierki pa dziejnaści anestezijalahičnaj słužby ŭ dziaržaŭnych klinikach i pryvatnych medcentrach.
Ministerstva, pravieryŭšy 25 ustanoŭ, pazbaviła licenzii na akazańnie anestezijolaha-reanimacyjnaj dapamohi 7 pryvatnych centraŭ: «Valere», «Hrandmedyka», «MedArt», «Medekspert», «Dziela zdaroŭja», «TransEnerhaOjł», «Ekamedservis». U častcy rabot i pasłuh pa hinekalohii — «Žadajem zdaroŭja» ŭ Słucku, u častcy rabot i pasłuh pa chirurhii — «Salfieja» ŭ Miensku, «Leda-Med» u Baranavičach, u častcy rabot i pasłuh pa chirurhičnaj stamatalohii «Stamaka» ŭ Voršy. U poŭnym abjomie spynienaja licenzija na medycynskuju dziejnaść «Fłorens-Dental» u Voršy — za pieraškody dziejnaści kamisii Ministerstva achovy zdaroŭja ŭ praviadzieńni kantrolu. Taki čynam, usiaho adabranyja licenzii całkam albo častkova ŭ 12 medyčnych centraŭ. Pra heta paviedamiŭ 19 červienia ministar achovy zdaroŭja Vasil Žarko.
