UUS Bresckaha abłvykankama pravieryć zakonnaść dziejańniaŭ milicyi pry zatrymańni vuličnych handlaroŭ u Pinsku, paviedamlajecca na sajcie abłasnoj milicyi.
Infarmacyja pra žorstki razhon vuličnych handlaroŭ źjaviłasia ŭ internecie 10 lipienia.
U paviedamleńni UUS Bresckaha abłvykankama havorycca, u pryvatnaści, što ŭčastkovy inśpiektar milicyi Pinskaha HAUS padčas vykanańnia svaich słužbovych abaviazkaŭ 7 lipienia trojčy naviedvaŭ terytoryju, jakaja prylahaje da doma № 118 pa vulicy Bresckaj, dzie hramadzianie rehularna sprabujuć vieści handal praduktami charčavańnia ź ziamli (u miescy, zabaronienym zakanadaŭstvam). Ź imi ŭčastkovy trojčy pravodziŭ hutarki, tłumačyŭ, što jany parušajuć zakanadaŭstva i mohuć nieści administracyjnuju adkaznaści, ale biezvynikova.
Kala 15 hadzin 7 lipienia ŭžo čaćviorty raz učastkovy vyjaviŭ parušeńnie pravił handlu na hetym miescy. Sumiesna z dvuma dziažurnymi naradami pałka PPSM jon «pryniaŭ miery pa spynieńni administracyjnych pravaparušeńniaŭ i zatrymańni pravaparušalnikaŭ, jakija akazali niepadparadkavańnie supracoŭnikam milicyi», havorycca ŭ paviedamleńni UUS.
U vyniku ŭ Zachodni hramadski punkt achovy hramadskaha paradku byli dastaŭleny try čałavieki: mužčyna 1957 hoda naradžeńnia i dźvie žančyny 1949 hoda naradžeńnia. U dačynieńni da mužčyny składzieny administracyjny pratakoł na padstavie art. 23.3 KoAP (umiašańnie ŭ vyrašeńnie spravy ab administracyjnym pravaparušeńni). 9 lipienia sprava była razhledžana ŭ sudzie Pinskaha rajona i Pinska, i jon pryciahnuty da administracyjnaj adkaznaści ŭ vyhladzie štrafu ŭ pamiery
U dačynieńni da žančyn składzieny administracyjnyja pratakoły na padstavie č. 8 art.12.17 (parušeńnie pravił handlu i akazańnia pasłuh nasielnictvu) i 23.4 (niepadparadkavańnie zakonnamu rasparadžeńniu ci patrabavańniu słužbovaj asoby pry vykanańni im słužbovych paŭnamoctvaŭ) KoAP. Spravy ab administracyjnych pravaparušeńniach nakiravanyja ŭ sud.
«UUS Bresckaha abłvykankama budzie praviedziena pravierka abhruntavanaści pradpryniatych mier z boku supracoŭnikaŭ pinskaj milicyi ŭ dačynieńni da zatrymanych asob i dadziena adpaviednaja pravavaja acenka», — havorycca ŭ paviedamleńni UUS.
